Galicia suma 604 desempregados en xullo fronte ao lixeiro descenso do paro da media estatal
O número de persoas desempregadas na comunidade ascendeu en xullo a 107.858; por provincias, todas contabilizaron un aumento, con A Coruña á cabeza, con 293 desempregados máis, un 0,69%, seguida de Pontevedra, que sobe un 0,42%, con 174 parados máis.
Comentarios
O paro rexistrado nas oficinas dos servizos públicos de emprego galegas ascendeu no mes de xullo en 604 persoas en xullo, ata 107.858 desempregados, un 0,56% máis que en xuño, segundo datos publicados este luns polo Ministerio de Traballo e Economía Social.
Esta cifra contrástase coa contabilizada a nivel nacional, xa que no total de España o paro baixou en 1.357 persoas entre xuño e xullo, ata 2.404.606 desempregados, a súa menor cifra neste mes desde 2007, segundo recolle Europa Press.
Nos últimos 12 meses, o paro en Galicia caeu en 10.187 persoas, un 8,63% menos, mentres que no total do país fixoo en 145.631 persoas, un 5,71% menos.
Por provincias, todas contabilizaron un aumento do paro en xullo, con A Coruña á fronte, con 293 desempregados máis, un 0,69%, seguida de Pontevedra, que sobe un 0,42%, con 174 parados máis. En Ourense hai 126 persoas sen emprego máis que en xuño, un 0,97% máis, mentres que en Lugo só 11 máis, un 0,11%.
O 59,5% dos parados en Galicia son mulleres, mentres que case un 3,6% é menor de 25 anos.
Por sectores, o paro en agricultura baixou en 64 persoas en xullo, mentres que en construción descendeu en 93 persoas e nas persoas que non tiña emprego previo, en 148. Sen embargo, subiu en servizos en 860 parados e en industria en 49.
Datos nacionais
A nivel nacional, o paro rexistrado nas oficinas dos servizos públicos de emprego baixou en 1.357 persoas en xullo en relación co mes anterior (-0,06%) ata situarse nun total de 2.404.606, sempre segundo datos do Ministerio.
Tras a caída de xullo, o número total de desempregados situouse en 2.404.606 persoas, a súa menor cifra nun mes de xullo desde 2007, destacou o Ministerio, que subliñou que o paro baixou por sexto mes consecutivo.
A baixada do paro en xullo deste ano é moi inferior á do mesmo mes de 2024 (-10.830) ou a de 2023 (-10.968). Trátase da caída menos acusada para un mes de xullo desde 2002.
Desde o inicio da serie histórica comparable en 1996, o paro reduciuse en todos os meses de xullo con excepción de 2005 (+14.557 desempregados), 2007 (+4.469), 2008 (+36.492) e 2022 (+3.230). O maior descenso nun mes de xullo produciuse en 2021, cando máis de 197.000 persoas abandonaron as listas do desemprego.
En termos desestacionalizados, o paro rexistrado diminuíu en xullo en 188 persoas respecto ao mes anterior.
No último ano, o desemprego acumula un descenso de 145.631 persoas, o que supón un 5,71% menos, cun retroceso do paro feminino de 79.762 mulleres (-5,18%) e unha caída do desemprego masculino de 65.869 varóns (-6,52%).
