Miles de persoas protestan na Illa de Arousa contra os proxectos de Altri e a mina de Touro

Nova protesta multitudinaria contra o proxecto de Altri en Palas de Rei (Lugo) e a reapertura da mina de Touro-O Pino. A protesta percorreu por terra e mar A Illa de Arousa facendo un chamamento para “parar” as iniciativas.

“Temos que seguir. Estamos obrigados a parar estes proxectos e este modelo industrial prexudicial para o conxunto de Galicia”, reclamou o presidente da Plataforma en Defensa da Ría de Arousa (PDRA), Xaquín Rubido, antes do inicio da mobilización, convocada por esta entidade xunto a Ulloa Viva e a Plataforma Mina de Touro-O Pino Non.

Baixo o lema ‘Re-matemos Altri e a mina de Touro-O Pino’, máis de 10.000 persoas percorreron A Illa desde a praia do Vao ata o porto do Xufre, segundo as cifras que manexa a organización. Preto de 300 barcos apoiaron a protesta por mar, mentres o resto de participantes percorrían o municipio por terra.

Neste sentido, Rubido acusou ao presidente da Xunta de “sacrificar” o río Ulla e a ría de Arousa para “beneficiar a uns privilexiados” e considera que estes proxectos “prexudican á maioría da sociedade galega, destrúen o tecido produtivo e desarticulan o territorio”.

Ademais, a portavoz de Ulloa Viva, Marta Gontá, esixiu a dimisión de Rueda, das conselleiras de Economía e Industria, María Jesús Lorenzana, e de Medio Ambiente e Cambio Climático, Ángeles Vázquez: “Deberían dimitir e deixar o seu posto a xente máis educada, máis empática e máis formada”.

Noticia en ampliación