A Xunta declara o nivel 2 de emerxencia en Boborás por un incendio que xa arrasa 150 hectáreas

O incendio declarado na noite do sábado en Boborás (Ourense) segue avanzando e calcinou unha área de unhas 150 hectáreas, segundo as últimas estimacións da Consellería do Medio Rural. O Executivo autonómico activou a Situación 2 de emerxencia como medida preventiva pola súa proximidade ao núcleo de Vecoa, na parroquia de Moreiras, onde se iniciou o lume. 

O incendio comezou ás 21.55 horas e esténdese por unha zona cunha orografía “complexa”, segundo a describe a súa alcaldesa, Patricia Torres. Cara ás 17.00 deste domingo, a estimación da área calcinada era de 50 hectáreas, unha cifra que variou en 100 máis nas dúas horas seguintes.

A complexidade da zona e as rachas de vento están dificultando durante esta tarde as tarefas dos medios desprazados. Ata agora, a Consellería do Medio Rural mobilizou catro técnicos, oito axentes, 20 brigadas, 11 motobombas, dúas unidades técnicas de apoio, tres pás, cinco helicópteros e nove avións.

Ademais, o Ministerio para a Transición Ecolóxica (Miteco) incorporou ao operativo efectivos da BRIF de Laza, que traballan de maneira coordinada cos da Xunta.

Os medios aéreos non puideron mobilizarse ata esta mañá, xa que non poden actuar pola noite. Iso dificultou desde o seu inicio a extinción do lume, que comezou “no medio e medio do monte” e, segundo as hipóteses que baralla a rexedora, puido ser provocado por un raio.