O Goberno atrasa a agosto a elección da sede da Axencia de Saúde Pública pola que suspira Lugo

A elección da sede da Axencia Estatal de Saúde Pública (AESAP), para a que Lugo parte en pole position, atrasa seis meses. A axencia Europa Press adiantou este martes que o Goberno atrasou este acto ao próximo 18 de agosto debido ao número de candidaturas presentadas, xa que “é necesaria unha valoración máis detallada”.

E é que as 8 candidaturas presentadas “requiren obras de fondo ou adecuacións técnicas” que deben ser valoradas. A sede debía terse dado a coñecer este martes, 17 de febreiro, no Consello de Ministros, pero finalmente terá que agardar seis meses máis. A AESP poderá operar desde a sede do Ministerio de Sanidade mentres se determina a sede definitiva,

Desde o Ministerio de Sanidade confirman a Europa Press que, “ata que finalice o proceso de elección da sede”, a AESP pode operar desde o Ministerio que, por outra banda, encargarase “dos estatutos para a súa aprobación”. “Unha vez aprobados os estatutos pódese seguir traballando nos primeiros pasos para poñer en marcha a sede, como a elección do consello reitor e os órganos de goberno”, sinalan.

O prazo máximo establecido polo Goberno, para elevar a proposta ao Consello de Ministros, era inicialmente este martes, o obxectivo era que a decisión saíse publicada no Boletín Oficial do Estado (BOE) do día seguinte, segundo informou na súa momento o Ministerio de Política Territorial e Memoria Democrática.

Deste xeito, non será ata agosto cando se coñeza a cidade que acolla esta sede pola que compiten Lugo, Toledo, Granada, Zaragoza, Murcia, Barcelona, León e Oviedo. O prazo de presentación de candidaturas finalizou o pasado 20 de xaneiro.

Así será a Aesap

A AESAP, cuxa creación foi aprobada o pasado xullo polo Congreso dos Deputados, busca reforzar as capacidades do Estado para responder ante futuras emerxencias sanitarias, así como traballar en vixilancia en saúde pública, en asesoramento e avaliación, en saúde pública internacional e en información e comunicación de riscos para a saúde.

O proceso, que se enmarca dentro da política de descentralización de sedes iniciada polo Goberno de España, continúa agora coa realización dun informe por parte do Ministerio de Sanidade, para o que ten un prazo de dez días.

Tras iso, a Comisión Consultiva constituída para a designación da sede elaborará e emitirá un ditame. Finalmente, a proposta elevarase ao Consello de Ministros, cun prazo máximo ata o 17 de febreiro, e a súa posterior publicación no BOE o 18 de febreiro.

Desde o Ministerio de Sanidade detallaron a Europa Press que, en paralelo ao proceso de elección da sede, estáse a elaborar o Estatuto da AESAP, que tamén será elevado ao Consello de Ministros. A continuación, haberá tres meses para constituír o Consello Reitor, encargado de elixir ao director da Axencia.