O Porto da Coruña impulsa Punta Langosteira como base para a reparación e mantemento de plataformas petrolíferas.

A Autoridade Portuaria da Coruña reivindica o potencial do porto exterior de Punta Langosteira como enclave de referencia para todo tipo de tráficos, escalas industriais e para as operativas máis complexas.

Desde o pasado de xaneiro a dársena acolle á plataforma petroleira Noble Voyager, de 228 metros de eslora (equivalente en lonxitude a máis de dous campos de fútbol profesionais) que se atopa atracada para a retirada das súas hélices de propulsión, que lle permitirá reducir o seu calado e así garantir o seu acceso posterior ao estaleiro de Navantia, en Ferrol.

O Noble Voyager será trasladado ás instalacións de Navantia en Ferrol unha vez que se retiren os propulsores. Unha vez finalicen os traballos no estaleiro regresará de novo ao porto de Langosteira para a reinstalación das hélices e a posta a punto final.

“A escala técnica desta unidade, coordinada por Berge Maritima, S.L., pon de manifesto, unha vez máis, a enorme versatilidade e capacidade do Porto Exterior para acoller buques de gran porte, plataformas petroleiras e operacións altamente especializadas e complexas, aproveitando as condicións operativas do porto”.

Segundo sinalan desde a Autoridade Portuaria, desde a súa entrada en funcionamento en 2012, estas instalacións recibiron xa un total de 13 buques para realizar distintos traballos de mantemento e reparación, un dato que confirma a viabilidade desta actividade como nova liña de negocio para a infraestrutura portuaria.

“A Autoridade Portuaria destaca que esta tendencia crecente evidencia as posibilidades comerciais asociadas á reparación naval no Porto Exterior, un ámbito que complementa a actividade loxística e industrial xa consolidada. A combinación de grandes superficies dispoñibles, accesibilidade marítima, amplos calados e un entorno operativo seguro e moderno está situando a Punta Langosteira como un destino cada vez máis atractivo para armadores e operadores técnicos”.

O aumento de escalas vinculadas a reparacións tamén reforza a creación de sinerxias con empresas do sector, xerando actividade económica e oportunidades de emprego especializado na área metropolitana da Coruña.

Por outro lado, pon en valor a consolidación dos tráficos de Punta Langosteira. En 2024 e 2025 superáronse os 8 millóns de toneladas de mercadorías cargadas e descargadas, e xa se superaron os 40 millóns de toneladas desde 2012. É a primeira dársena de Galicia en volume e movemento de mercadorías.