Os incendios en Maceda e Chandrexa de Queixa obrigan a desaloxar aos veciños
Os lumes no Macizo Central de Ourense deixan xa máis de 3.000 hectáreas queimadas, sendo Maceda e Chandrexa de Queixa os concellos máis afectados.
Varias personas observan el incendio en Zamorela, a 11 de agosto de 2025, en Chandrexa de Queixa, Ourense / Europa Press
Comentarios
O lume no Macizo Central de Ourense segue avanzando e xa deixa máis de 3.000 hectáreas queimadas entre Maceda e Chandrexa de Queixa. Segundo informa o 112 Galicia a Europa Press, foi necesario desaloxar a cinco veciños de dúas vivendas no lugar de A Senra, en Chandrexa, ao longo desta madrugada.
A Consellería de Medio Rural activou a Situación 2 por risco para vivendas durante a madrugada deste martes nas parroquias de Requeixo, Vilar e Zamorela, en Chandrexa de Queixa. Fixo o propio pola proximidade do lume ás parroquias de Calveliño do Monte e Santiso (ambas en Maceda).
Pola súa banda, a alcaldesa de Maceda, Uxía Oviedo, asegurou á axencia Europa Press que se desaloxaron a uns catro veciños en Calveliño do Monte, onde se fixo un contrafogo para asegurar a aldea. Esta mañá de martes “estase a avaliar o terreo para mirar como proceder na xornada de hoxe”, pero teme que “o lume vai subir cara a Montederramo”.
Segundo a rexidora, trátase de “un terreo moi complicado” no que xa houbo incendios no pasado. “Agora mesmo, debido á situación que está acontecendo en toda a provincia de Ourense, está sendo bastante complicado por parte da Xunta chegar ás necesidades de todos os incendios“, expón Oviedo.
Os incendios en Galicia
O incendio en Chandrexa arrasa máis de 3.000 hectáreas, máis que todo o queimado en Galicia durante 2024. Segue sen controlar desde o pasado venres e incorpóranse ás tarefas de extinción membros da Unidade Militar de Emerxencias (UME). Entre outros medios, foron mobilizados 14 avións e 12 helicópteros.
Tamén están activos os incendios de: Vilardevós, parroquia de Moialde (40 hectáreas) -xa desactivada a Situación 2 en Silva e San Paio-; Cartelle, parroquia de Anfeoz (20 hectáreas); Montederramo, parroquia de Paredes (120 hectáreas); e Samos, parroquia de Santalla (200 hectáreas).
Pola súa parte, están estabilizados os lumes de: Vilariño de Conso, parroquia de Mormentelos (180 hectáreas); Maceda, parroquia de Castro de Escuadro (450 hectáreas); A Estrada, parroquia de Souto (20 hectáreas).
Están controlados os incendios de Monfero, parroquia Queixeiro, que afecta ao parque natural de As Fragas do Eume (5 hectáreas), e A Fonsagrada, parroquia de Monteseiro (150 hectáreas); e en Verín, parroquia de Mourazos (9 hectáreas). Está extinguido o lume de Padrenda, parroquia homónima (41,6 hectáreas).
