Os transportistas galegos acusan a Xunta de darlles «a costas» co seu plan pola guerra en Irán

O Comité Galego de Transportes abre fogo contra a Xunta de Galicia pola falta de medidas para o sector ante a crise desatada pola guerra en Irán. Os transportistas galegos esixen ao Executivo autonómico que inclúa actuacións específicas no plan de medidas de axuda aos sectores máis afectados pola guerra en Oriente Medio.

A través dun comunicado, desde a asociación reclaman ao Goberno que capitanea Alfonso Rueda que os convoque de forma urxente, como órgano de representación do sector. Neste sentido, os transportistas sosteñen que non entenden que se diga que o Executivo autonómico mantivo reunións cos sectores máis afectados para coñecer o impacto dos custos enerxéticos “e non escoitase aos empresarios do transporte de mercadorías por estrada”.

Segundo lembran ao conselleiro de Facenda, Miguel Corgos, o sector ten máis de 6.600 pequenas e medianas empresas e autónomos que suman unha flota de uns 27.000 vehículos e que o gasóleo representa preto dun 40% dos custos de cada quilómetro.

É por iso que os empresarios do transporte din non entender que non teñan para a Xunta “a condición de sector especialmente afectado” polas consecuencias da guerra en Irán e acusan ao Goberno galego de darlles “a costa”. Por todos estes motivos, desde o Comité Galego de Transporte acordaron esixir “unha rectificación inmediata” ao Goberno de Alfonso Rueda, demandando que os convoque de forma urxente para abordar as actuacións necesarias para o sector.