Prealerta por seca: Santiago chama ao consumo responsable e tres concellos alertan de problemas de abastecemento.

O Concello de Santiago fixo un chamamento á cidadanía para realizar un consumo responsable da auga, en plena vaga de calor mentres que os concellos de Bergondo, Sada e Oleiros advertiron de problemas de abastecemento de auga potable, que tamén afectan a Cambre, debido a que a infraestrutura que lles subministra está ao límite.

En un comunicado o concello santiagués fixo un chamamento á cidadanía para realizar un consumo responsable da auga, en plena vaga de calor. Tal e como recolle un comunicado municipal, a escaseza de precipitacións está afectando ao ciclo da auga e durante os meses de xullo e agosto obsérvase unha redución progresiva do caudal do río Tambre, situación que se repite cada ano.

Con todo, segundo os rexistros dispoñibles, o nivel do río no punto de captación da ETAP de Santiago –principal fonte de abastecemento da cidade– reduciuse un 2,56% respecto ás mesmas datas de verán de 2024.

Aínda que os rexistros dispoñibles non supoñen, por agora, un risco para o subministro nin motivou a activación de alertas oficiais, é importante apelar á prevención e ao “uso racional” dun recurso limitado.

Neste contexto, o Concello chama aos veciños a adoptar hábitos cotiáns de aforro de auga, como pechar as billas durante o cepillado de dentes ou lavados de mans; revisar posibles fugas nas instalacións domésticas; usar lavadora e lavalouzas só con carga completa, e non empregar auga para encher piscinas particulares.

Problemas de subministros

Por outro lado, os responsables de Emalcsa reuníronse na mañá deste venres cos alcaldes e alcaldesas de Bergondo, Sada, Oleiros e Cambre para advertir deste perigo.

Segundo un comunicado do Concello de Sada, non se trata dun problema relacionado coa falta de auga, senón que está vinculado á infraestrutura que subministra aos municipios. Así, dende o 24 de xullo consómese máis auga da que o sistema ten capacidade de repoñer.

Deste modo, Sada pide publicamente que se amplíe o colector de A Telva que subministra ás localidades, así como a construción dun novo no lugar de Sarro. “É imprescindible que a Xunta de Galicia e Emalcsa colaboren cos concellos da comarca da Coruña para garantir unhas infraestruturas adecuadas ao crecemento da poboación que está experimentando a área”, avisa Sada.

Pola súa parte, o Concello de Oleiros tamén se dirixe ao Goberno galego e a Emalcsa e pide a renovación das conducións desde A Telva ata o depósito de Espírito Santo.

“No caso de chegar a colapsar o sistema, en Oleiros a existencia dos 11 depósitos do Concello permitiría garantir o subministro durante 2 ou 3 días; en principio, tempo suficiente para que o depósito de Espírito Santo se recuperase”, advirte.

Con todo, Sada e Bergondo chaman á cidadanía a un uso responsable deste recurso. O segundo municipio lembra que a auga da traída ten que empregarse só para uso doméstico, evitando facer riegas e baldeos, limpeza de vehículos, enchido de piscinas ou calquera outro uso non esencial.