Rueda, no centro de protonterapia co equipo doado por Amancio Ortega: “Non estamos en Houston, é Galicia”
O presidente da Xunta enaltece o equipo, que xa está instalado e comezará a tratar pacientes a finais de ano ou principios de 2027.
Alfonso Rueda visita o centro de protonterapia de Galicia, situado en Santiago de Compostela. Foto: Xunta
Comentarios
O presidente da Xunta, Alfonso Rueda, asegura que o acelerador de protóns Proteus One do Centro de Protonterapia “marcará un antes e un despois no tratamento do cancro en Galicia”. “Xa é unha realidade”, celebra nun vídeo difundido nas súas redes sociais este domingo, que amosa parte das instalacións.
“É unha infraestrutura potente e innovadora; e non estamos en Houston, estamos en Galicia”, engade Rueda. O titular do Goberno galego, xunto co conselleiro de Sanidade, os radiofísicos responsables da posta en marcha do proxecto e técnicos da empresa IBA, visitou recentemente a zona do búnker do centro.
Alí está situado o acelerador de protóns, que xa está instalado. Este equipo, financiado pola Fundación Amancio Ortega cunha inversión de 28 millóns de euros, é actualmente “o primeiro de toda España”, segundo remarca a Xunta.
Final de ano
A visita permitiu a Rueda ver o acelerador antes de que sexa cuberto e comecen as probas co feixe de protóns. O presidente defende este proxecto autonómico como “un dos maiores fitos” na medicina oncolóxica de precisión.
A Xunta prevé comezar a tratar os primeiros pacientes a finais de 2026 ou principios de 2027, tanto galegos como procedentes de Castela e León, Asturias e o norte de Portugal, cunha capacidade estimada de 250 persoas ao ano. O centro estará especialmente enfocado en pacientes oncolóxicos con alta expectativa de supervivencia, con atención destacada á poboación infantil.
