Telefonistas, mecánicos, electricistas, fontaneiros… O Sergas convoca preto de 400 novos postos de emprego
O prazo para presentar as solicitudes comezará o próximo 1 de outubro e estará aberto ata o 14 de novembro.
Comentarios
O Sergas busca traballadores. O Diario Oficial de Galicia publica este mércores as convocatorias de 378 prazas, ás que se poderá acceder polo sistema de concurso oposición, para o ingreso en distintas categorías do Servizo Galego de Saúde de persoal licenciado e diplomado sanitario, así como de xestión e de servizos.
En concreto, para persoal licenciado sanitario son 121 as prazas que se convocan na categoría de médico de urxencias hospitalarias, das cales 9 son polo turno de discapacidade. A elas hai que sumar outras 8 correspondentes á categoría de médico asistencial do 061.
Pola súa banda, para diplomados sanitarios son 27 as prazas para fisioterapeutas (dúas reservadas para persoas con discapacidade), 5 de logopeda e 11 de terapeuta ocupacional (unha de discapacidade).
Máis prazas do Sergas
Ademais de persoal sanitario, o Servizo Galego de Saúde tamén convoca prazas nas categorías de xestión e servizos:
- 7 prazas de calefactor (2 por discapacidade)
- 15 de condutor (2 por discapacidade)
- 11 de electricista (1 por discapacidade)
- 8 de fontaneiro
- 5 de mecánico
- 17 de telefonista (2 por discapacidade)
- 6 de lavandeiro
- 11 de planchista (1 por discapacidade)
- 15 de cociñeiro (1 por discapacidade)
- 111 de pinche (5 para o turno de discapacidade xeral e outras 5 por discapacidade intelectual)
As persoas que desexen participar no proceso selectivo deberán cubrir unha única solicitude de participación por categoría, a través da Oficina Virtual do Profesional Fides, dentro da sección “expedient-e” onde deberán acceder ao directorio “Sección de Procesos” e posteriormente a OPE.
O prazo para presentar as solicitudes comezará o próximo 1 de outubro e estará aberto ata o 14 de novembro.
Máis de 5.000 prazas convocadas
O Executivo autonómico destaca que, no que vai de ano, o Sergas publicou a convocatoria dos procesos selectivos para 72 categorías de persoal con 5.319 prazas.
“Ditos procesos selectivos, convocados mediante o sistema de concurso-oposición inclúen, ademais das categorías publicadas no Diario Oficial de Galicia de hoxe, a categoría de enfermaría con 1.980 prazas, diversas especialidades de facultativo especialista de área con 426 prazas, diversas especialidades de enfermeira especialista con 260 prazas, persoal informático superior e de formación profesional con 23 prazas, técnico sanitario con 1.411 prazas e diversas categorías de xestión e servizos con 841 prazas”, explican.
