A eólica galega lidera o emprego e a contribución ao PIB en España a pesar da parada do sector.
O informe da patronal eólica española cifra en 357 millóns a contribución directa ao PIB do sector en Galicia en 2024, menos da metade que en 2022.
Operarios nun parque eólico / Disa Group / Anuario AEE
Comentarios
A Asociación Empresarial Eólica, a patronal do sector en España, presentou o estudo macroeconómico que elabora para eles KPMG e que mide o impacto económico no país dos produtores. Galicia volve a saír en postos destacados a pesar do parón que atravesa a instalación de novos parques debido ás paralizacións decretadas polo Tribunal Superior de Xustiza de Galicia ante o risco de danos ambientais e as poucas garantías que, segundo entenden os maxistrados, ofrece o procedemento de autorización da Xunta.
A pesar de que gran parte das inversións están conxeladas, a comunidade continuaba ao peche de 2024 como a cuarta de España por potencia instalada, con 3.920 megavatios, e a cuarta en xeración, pois representou o 14,5% da enerxía producida no Estado a partir do vento, con 8.636 GWh. En territorio galego, segundo o informe, había 186 parques, o 13% dos que hai en toda España. A maioría pertencen a Iberdrola, Endesa, Acciona e Naturgy, os principais operadores do sector na comunidade, segundo recolle o Inega.
Ademais, Galicia liderou en 2024 tanto o emprego xerado en España polo sector eólico como a contribución ao PIB. É unha boa nova pero non tanto como podería parecer, pois dita contribución desplomouse nos dous últimos exercicios.
Un impacto de 357 millóns
Os datos calculados por KPMG indican que a contribución do sector eólico ao PIB galego situouse en 2024 nos 357,3 millóns, o máis elevado de todas as comunidades autónomas. As que máis preto estiveron foron Castela e León, con 282,9 millóns; e Aragón, con 256,5 millóns. Son os dous territorios con máis potencia instalada e maior xeración eólica do Estado, pois o primeiro suma 7.127 megavatios e o segundo 5.480. En Castela-A Mancha, que ocuparía o terceiro chanzo do pódium en canto a potencia instalada, a contribución ao PIB quedou por debaixo dos 200 millóns.
A pesar da lideranza, a contribución do sector eólico desplomouse nos últimos anos en Galicia. O mesmo estudo situaba a achega en máis de 756 millóns en 2022 e en 412 millóns en 2023, polo que debuxou unha acusada curva descendente, unha caída a menos da metade en dous anos.
No emprego tamén reina Galicia. Os traballadores directos do sector eólico alcanzan os 3.692, por riba dos 3.367 do País Vasco, que ocupa o segundo posto. Os profesionais ubicados en territorio galego representan o 18% do emprego xerado polo sector en todo o Estado.
