A galega Externa aumenta un 31% os seus ingresos e aspira a acadar os 90 millóns en 2026

A empresa galega Externa –especializada en xestión integral de recursos humanos, traballo temporal, externalización de servizos (outsourcing), recrutamento e selección directa, formación e consultoría– pechou o 2025 cun incremento na facturación do 31,10% ata os 73 millóns, “cumprindo o obxectivo de vendas, cunha mellora moi notable da súa rendibilidade e coa apertura de oficinas en Martorell, Cartagena e Zaragoza”.

O incremento da facturación en España foi do 28,60% fronte ao 51,7% de Portugal, onde a compañía está presente con delegacións en Oporto e Lisboa (Win Working by Externa) desde 2023, froito dun proceso de internacionalización que lle permite operar tamén noutros países da Unión Europea.

A compañía marca como obxectivo acadar os 90 millóns de euros de facturación neste 2026, o que se traduciría nun crecemento do 23,84% entre España e Portugal sobre os datos de vendas ao peche de 2025, e chegar aos 100 millóns en 2027. O CEO de Externa, Pastor López Docampo, considera que para seguir esa senda de éxito quere “pisar o acelerador na área de Traballo Temporal da compañía e reforzar a división de formación (empresa Exterfor) nos próximos dez meses, ao tempo que se segue explorando un posible crecemento inorgánico, tanto en España como en Portugal”.

As previsións para o presente ano comprenden ademais o crecemento orgánico mediante o ensanchamento da rede territorial de oficinas, que inclúe a apertura de novas delegacións en Málaga -que xa puxo en marcha no pasado mes de xaneiro-, e a posible apertura en Granollers e Tarragona (Cataluña), e Alcalá de Henares (Madrid), xunto cun desenvolvemento xeral na zona centro.

“Considero moi relevante lograr que o persoal da empresa se sinta implicado en todo momento nos seus obxectivos e metas, algo que en parte xa conseguimos, como revelan os baixísimos índices de rotación que temos na nosa plantilla”.

Convención Nacional de Externa

A firma acaba de celebrar os seus vinte primeiros anos de existencia reunindo ao seu equipo, máis de 80 persoas de toda España na súa XII Convención Nacional, que tivo lugar no Espazo Avenida de Abanca, na Coruña.

Docampo, fixo un repaso aos numerosos fitos da empresa desde que puxo en marcha no ano 2006 e amosouse “especialmente satisfeito polos resultados obtidos no pasado exercicio que”, segundo el, “abren a porta a un futuro moi ilusionante”.

A XII Convención Nacional de Externa, empresa de capital netamente español e con sede central na Coruña, estivo tamén encabezada -ademais de por López Docampo-, polo seu director xeral, Fernando Berdugo.