A miopía da Zona Franca de Vigo cos grandes grupos empresariais galegos

Se o Consorcio da Zona Franca de Vigo recorre aos seus propios informes para tomar decisións cometerá máis dun erro. E serán de volume. O “esforzo conxunto do equipo técnico do consorcio e de investigación da Cátedra Ardán da Universidade de Vigo” ao que fai alusión David Regades, o delegado do organismo, na presentación do último Informe Ardán non parece suficiente para evitar casos que serven para ilustrar erros e imprecisións na consolidación dos grandes grupos empresariais galegos que ofrece o traballo. Entre outros, destacan os de Inditex, Gadisa, San José, Finsa, Luckia, Ecoener, Plexus, Trison ou Greenalia.

O traballo, que se edita anualmente, leva por título “Ardán Galicia 2025, informe económico e de competitividade”, e está armado sobre unha mostra representativa en 2023 de máis de 44.000 empresas galegas. O volume de negocios obtido ascendeu a 139.463 millóns de euros e a riqueza xerada (valor engadido bruto) foi de 33.479 millóns de euros.Un dos apartados que mostran a maior representatividade empresarial, a través dos grupos consolidados, e que dá idea do peso real das grandes corporacións galegas, presenta inexactitudes facilmente chequeables nas mesmas fontes ás que alude o informe.

Casos reveladores

O estudo presenta dous rankings das 25 principais empresas galegas (por ingresos e por riqueza xerada) a partir das contas de resultados e balances individuais das compañías, o que propicia que un mesmo grupo teña doce compañías entre esas 25 seleccionadas, caso de Inditex. Ambos rankings identifican con distinta sorte os grupos aos que pertencen esas compañías (coloca a Sacyr como propietaria de Audasa). Os problemas e as imprecisións chegan cando se presenta outro ranking, a priori máis revelador, o dos grupos consolidados. Algunhas mostras.

Ecoener, sen ir máis lonxe, intégrase dentro dun grupo do que é sociedade dominante Luis de Valdivia SL, que prepara e formula contas anuais consolidadas que se atopan depositadas no Rexistro Mercantil da Coruña, como explica a propia compañía. Pois ben, o ranking da Zona Franca, cos depósitos consolidados das compañías, coloca no posto 115 a Luis de Valdivia SL e no 116 ao Grupo Ecoener. A ambas outórgalles a mesma cifra de negocios e a Luis de Valdivia atribúelle 104 sociedades no seu perímetro de consolidación e a Ecoener, 99, nunha clara mostra das duplicidades que se xeran no ranking.

De Inditex a Gadisa ou Finsa

Máis casos. Só entre os dez primeiros grupos que presenta o cadro que acompaña ao informe, e que reproduce Economía Digital Galicia, hai catro situacións similares. Trátase de Pontegadea…