A Barrié recorta un 40% os beneficios en 2025 a pesar de subir os alugueres ao Santander

Non falta moito para que se cumpran dez anos desde a caída do Banco Popular e a Fundación Barrié de la Maza dá mostras de fortaleza. Sen o músculo de antes, cando o seu patrimonio superaba os 300 millóns polo valor das accións do banco de Ángel Ron, a entidade pecha ben os exercicios, xera superávit, consegue ingresos mediante investimentos financeiros e ten amarrados os alugueiros ao Santander, que lle reportarán 25,9 millóns ata o ano 2030.

No último curso, a fundación que preside Pilar Romero Vázquez-Gulías desde o falecemento de José María Arias logrou uns beneficios de 6,9 millóns, un 40,8% por baixo dos obtidos en 2024. Este retroceso débese ao peor desempeño das operacións financeiras, que o ano pasado xeraron un excedente de 4,4 millóns cando hai dous anos deixaran máis do dobre, 9,5 millóns.

As Barrié tiña a peche de decembro 86 millóns en investimentos financeiros a curto prazo, un salto considerable desde os 75 millóns de 2024. Este diñeiro móvese por medio cento de fondos de investimento e en valores representativos de débeda.

Ao marxe destas operacións, a actividade ordinaria da fundación logrou un excedente de 2,5 millóns, sostida polos ingresos polo arrendamento de inmobles ao Santander, ademais das axudas e os patrocinio propios da obra social. En conxunto, os ingresos ordinarios da institución situáronse nos 7,8 millóns, por riba dos 7,5 millóns de 2024.

Entre unha cousa e outra, os réditos financeiros e os ingresos ordinarios, a Barrié xerou ese superávit de 6,9 millóns, que lle permite perseverar na dinámica positiva que iniciou tras as grandes perdas provocadas pola caída do Pastor e o Popular, cando o seu patrimonio neto se reduciu a menos da metade. A peche de 2025, alcanzaba os 184 millóns, por riba dos 178 dun ano antes. Cando a Xunta Única de Resolución declarou inviable o banco e entregouno ao Santander por un euro, o patrimonio da fundación caeu aos 144 millóns, polo que sumou 40 millóns de solvencia ao seu balance desde entón.

Os alugueiros do Santander

A principal fonte de ingresos da fundación, cando menos a máis estable, son as rendas que percibe do banco de Ana Botín polo arrendamento de oficinas. O ano pasado, a Barrié obtivo 7,3 millóns por este concepto, dos que 13.000 euros procedían do aluguer de prazas de garaxe e o resto dos inmobles. O exercicio anterior obtivera 7,1 millóns deste mesmo negocio, mentres que este 2026 espera ingresar 7,42 millóns.

O contrato co Santander, ademais de debuxar ese incremento de prezos anual, ten un período obrigatorio de 20 anos que vence en 2029. Ata entón, entre 2026 e 2029, a fundación percibirá outros 26 millóns polos arrendamentos. Despois, Botín ten a posibilidade de prorrogar o contrato 20 anos máis e unha opción de recompra ao “valor razoable dos bens arrendados”, segundo indica a memoria de exercicio da fundación.