CC.OO. defende o acordo coa patronal de Inditex e Primark: «Mellora as condicións do 95% do persoal»
O sindicato asegura que o preacordo inclúe garantías para que non se produzan reducións salariais cando o convenio provincial estableza unha retribución superior e critica a alarma xerada por outras centrais, en alusión á CIG, con interpretacións "erróneas" do documento.
Traballadora nunha tenda de Zara
Comentarios
O longo proceso de negociación para alumear un convenio de ámbito estatal que regule as condicións dos traballadores das tendas das grandes multinacionais da moda chega á súa fase final con discrepancias entre sindicatos, á hora de interpretar as bondades do preacordo asinado por ARTE, Comisións Obreiras e Fetico. Aínda pendente de consolidarse, o documento é relevante na medida en que afectaría a máis de 100.000 traballadores das grandes compañías que integran a patronal, como Inditex, Mango, H&M, Primark, Bimba y Lola ou Tendam, entre outros.
A CIG lanzou un comunicado moi crítico co preacordo, alertando de recortes nos salarios dalgúns traballadores. CC.OO. emitiu este mércores outro no sentido contrario. A central advirte que o texto non supón perda algunha de dereitos salariais, pois inclúe garantías específicas para que iso non suceda. En concreto, incorpora unha cláusula de complemento ad personam que garante o mantemento das condicións salariais que estean por riba nos convenios provinciais das acordadas con ARTE.
“CC.OO. considera moi preocupante que se trasladen á opinión pública interpretacións parciais ou directamente erróneas sobre o contido do preacordo. Parte desas críticas apoianse en cuestións que nin sequera foron abordadas aínda na negociación, o que distorsiona o debate e xera unha alarma inxustificada entre o persoal”, di o sindicato.
Marco común de dereitos mínimos
Na interpretación de CC.OO., o obxectivo do convenio estatal é establecer un marco común de dereitos mínimos para evitar desigualdades entre territorios. A aplicación de táboas salariais, redución de xornada anual e conciliación da vida laboral e familiar supoñen un avance, segundo din, respecto a máis do 95% dos convenios provinciais do Estado.
No caso de Galicia, falan dun “salto relevante” en provincias como Ourense e Lugo, onde se produce unha mellora respecto a convenios “obsoletos” e con “salarios no SMI”, como o comercio téxtil de Lugo, “sen actualizar desde xaneiro de 2016”; comercio, pel e calzado de Lugo, “sen negociar desde xaneiro de 2010”; comercio téxtil de Ourense, “sen actualizar desde xaneiro de 2024”; comercio-pel de Ourense, “sen negociar desde xaneiro de 2013”.
Redución de xornada
Comisións Obreiras sinala que o preacordo recolle unha redución progresiva de xornada ata as 1.740 horas anuais en 2028, “por debaixo da proposta que non puido pactar o Goberno con CEOE en canto a redución de xornada laboral”. Tamén se incrementan os fins de semana completos de descanso ata 11, segundo indica o sindicato.
“Este aspecto resulta especialmente relevante nun sector con alta presenza de contratación a tempo parcial, que impacta de maneira directa nas condicións económicas de moitas traballadoras. Ademais, o preacordo establece unha garantía de contratación mínima de 24 horas semanais, contribuíndo a unha maior estabilidade laboral”, engade.
