Europa segue a Trump e consuma o golpe a Shein e Temu: pon fin aos envíos gratuítos e cobrará taxas en 2028.

A Unión Europea consuma a súa cruzada contra os envíos low cost. Os Estados membros aprobaron este xoves a eliminación das exencións arancelarias que se aplican actualmente aos envíos dun valor inferior aos 150 euros procedentes de terceiros países. O obxectivo é frear a avalancha de paquetes que chegan, principalmente desde China, a través de plataformas como Shein, Temu ou AliExpress.

A medida aprobada en Bruxelas entrará en vigor en 2028. A pesar diso, o acordo aprobado polos ministros de Economía prevé traballar nun mecanismo transitorio que permita comezar a cobrar as taxas de aduana a principios do próximo ano ao tratarse dun problema demasiado urxente que non pode esperar dous anos.

“A eliminación do limiar libre de aranceis significa que os dereitos de aduana terán que pagarse desde o primeiro euro en todos os bens que entren na UE” e tamén o IVE, dixo a ministra de Finanzas de Dinamarca, Stephanie Lose, cuxo país preside este semestre o Consello da UE. “Vamos traballar cos Estados membro e a Comisión para desenvolver unha solución simple e temporal o antes posible xa en 2026”.

Presión contra o low cost

A tensión contra o modelo de comercio electrónico de xigantes asiáticos creceu exponencialmente nos últimos meses. O pasado maio Asociación Austriaca de Comercio Minorista e Greenpeace solicitaron ao Goberno austríaco e á Comisión Europea solicitaron medidas para aplacar a chegada masiva de paquetes destas plataformas polo “prexuízo que supoñían tanto para os comerciantes europeos como para os consumidores e o medio ambiente”.

Segundo os cálculos do Executivo de Ursula von der Leyen, o ano pasado entraron no mercado europeo arredor de 4.600 millóns de envíos low cost (de 150 euros ou menos) a razón de uns 12 millóns de paquetes diarios, o dobre que o ano anterior e o triplo que en 2022.

O comisario europeo de Comercio, Maros Sefcovic, destacou que esta “inundación” de paquetes “representa un desafío para o control e a seguridade”. “Estamos falando de dous euros por paquete pagados pola plataforma. E se é por servizos ofrecidos polos almacéns nos que eses paquetes son almacenados, é incluso menos, de 0,50 euros”, apuntou.

A UE segue o mesmo camiño iniciado polo presidente dos Estados Unidos, Donald Trump, que eliminou a principios de maio a chamada exención de ‘minimis’ ás importacións procedentes de China e Hong Kong dun importe inferior a 800 dólares e que eximía o pago de aranceis.