Inditex sofre a segunda maior caída do IBEX, pendente de Donald Trump e do bloqueo de Ormuz
A multinacional de Amancio Ortega retrocede un 6,8% na bolsa desde o ataque de Estados Unidos e Israel a Irán; o prezo do petróleo Brent escalaba case un 7% ao peche da sesión nas bolsas europeas.
Donald Trump nunha montaxe coa sede de Inditex de fondo
Comentarios
O IBEX 35 pechou a sesión deste luns cunha caída do 0,99% nunha nova xornada marcada polos movementos de Donald Trump no Oriente Medio. O naufragio das conversas de paz deste fin de semana e o anuncio do presidente estadounidense do bloqueo do estreito de Ormuz e os portos iraníes empuxou o prezo do cru por riba dos 100 dólares o barril, síntoma de sufrimento para os mercados europeos.
No retroceso do selectivo español viu involucrada Inditex, que acumula un 6,8% de caída desde o ataque de Estados Unidos e Israel a Irán. A multinacional de Amancio Ortega anotouse o segundo maior golpe da xornada, cunha depreciación das súas accións do 2%, só por detrás de Acciona Energía, cun 2,08%. Aena (-1,94%), Solaria (-1,77%), Banco Santander (-1,58%), Redeia (-1,56%) e Cellnex (-1,53%) seguiron como as compañías máis penalizadas, en contraste con Mapfre (+0,78%), Unicaja (+0,72%), Bankinter (+0,72%), Rovi (+0,60%) e Repsol (+0,32%), que tiveron un desempeño positivo.
Os recortes, en todo caso, son moderados no conxunto dos mercados europeos, a pesar dalgunhas voces de alarma como a do conselleiro delegado de Moeve (antiga Cepsa), Maarten Wetselaar, quen advirte de un risco real de desabastecemento físico de combustibles en Europa se a guerra no Oriente Medio se prolonga. Londres deixouse un 0,17%; París, un 0,29%; Fráncfort, un 0,26%; e Milán, un 0,17%.
Inditex pechou o día cunha capitalización de 164.933 millóns e ten a Banco Santander no retrovisor como segundo grupo con máis valor en bolsa, ao situarse por riba dos 152.000 millóns.
Sobe o petróleo e fala De Guindos
O prezo do petróleo Brent –de referencia en Europa–, subía un 6,97% ao peche da sesión europea, ata os 101,87 dólares por barril, mentres que o West Texas Intermediate (WTI) –de referencia EEUU– negociábase sobre os 103,06 dólares, cun avance do 6,72%. No mercado de renda fixa, o rendemento do bono español con vencemento a 10 anos repuntou ata o 3,552%, fronte ao 3,516% rexistrado ao peche do venres. Deste xeito, a prima de risco fronte ao bono alemán avanzaba dúas décimas, ata os 46 puntos básicos. Respecto ás divisas, o euro depreciábase un 0,12% fronte ao dólar, ata cruzarse a un tipo de cambio de 1,1709 dólares por cada euro.
O vicepresidente do Banco Central Europeo (BCE), Luis de Guindos, asegurou este luns que calquera posible resposta da política monetaria, particularmente a suba dos tipos de interese, ante a situación desencadeada pola guerra de Irán “dependerá dos efectos de segunda rolda”.
