José Blanco e Alfonso Alonso venden a súa consultora Acento ao grupo francés Havas.

Catro meses de negociacións para pechar unha das operacións do ano no mundo da consultoría. Havas Media Group, unha axencia de comunicación francesa con forte presenza internacional, pechou a compra da maioría do capital de Acento Public Affairs, a consultora fundada polos exministros José Blanco (PSOE) e Alfonso Alonso (PP), que durante os últimos anos rexistrou un forte crecemento, tanto en vendas como en equipo.

Propiedade de Vivendi, o grupo galo fíxose coa maioría do capital de Acento Public Affairs e os exministros Blanco e Alonso, cabezas visibles, seguirán traballando na compañía, segundo adianta El Confidencial.

Operación e dimensións

A compra da consultora, destaca, é un paso na estratexia de Havas Media e de Vivendi para tomar posicións no mercado español, onde xa é accionista significativo de Prisa, editor de El País e a Ser, cun 11% do capital. Aínda que ata o momento non trascenderon cifras, varias fontes apuntan a que o importe da operación ronda os 30 millóns de euros.

O 2024 foi un ano récord para Acento Public Affairs. A consultora pechou o exercicio con máis de dous millóns de euros de beneficio e 9,6 millóns de facturación tras crecer un 22%. Os beneficios da consultora incrementáronse un 47%, ata alcanzar os 2,09 millóns de euros. A firma optou, ao igual que en exercicios anteriores, por descartar a opción de abonar un dividendo aos seus accionistas. No seu lugar, destinou a totalidade desta cantidade a reservas voluntarias.

Este ano, a consultora estreou novos clientes: entra a Euroliga de baloncesto e saen Marrocos e Huawei. Acento Public Affairs sufriu un recorte de ata o 80% no seu negocio como lobbista en Bruxelas en 2025, pero captou a Euroleague Ventures, AstraZeneca ou Veolia Environnement como novos clientes.