Os traballadores alertan da crise en Losán e ven 150 empregos en risco
Un grupo de empregados da segunda maior madeireira galega concentrouse este xoves en Curtis para denunciar os impagos e para reclamar unha solución que permita manter a continuidade dos postos de traballo.
Imaxe da protesta dos traballadores de Industrias Losán en Curtis / CIG
Comentarios
Os traballadores de Industrias Losán retoman as mobilizacións ante a crise que vive a empresa. Un grupo de empregados da segunda maior madeireira galega concentrouse este xoves en Curtis para denunciar a ameaza de perda de 150 empregos, que suporía un “golpe directo ao corazón económico do rural”.
A plantilla, que sofre impagos desde hai meses, quixo visibilizar a súa problemática dun grupo de derivados da madeira que conta con plantas en Curtis e Vilasantar. Queremos traballar e cobrar, non mendigar, podía lerse na pancarta detrás da cal protestaron traballadores co comité, unha protesta apoiada pola CIG.
“Moitos dos traballadores e traballadoras somos veciños e veciñas destes concellos. Vivimos aquí, consumimos aquí e sustentamos co noso traballo o comercio local. A perda destes empregos tería consecuencias directas en toda a economía da zona”, advirte o comité de empresa.
Alerta de que o peche das fábricas obrigaría a moitas familias a marchar a buscar emprego fóra, cun impacto no tecido social e económico local.
