Unha auditoría encargada polo Goberno de Uruguai considera “satisfactoria” a calidade dos buques de Cardama.

A finais de outubro o Goberno de Uruguai anunciou o inicio das accións para rescindir o contrato co estaleiro vigués Cardama ao que encargou a construción de dúas patrullas oceánicas (OPV) por 82,5 millóns de euros. O Executivo que encabeza Yamandú Orsi iniciou unha serie de accións para contar coa maior de probas posibles para demostrar os incumprimentos da compañía do proceso. Unha delas é unha auditoría sobre a calidade dos materiais e da soldadura da construción dos buques.

Segundo avanza o diario El País UY, a mediados de decembro contratouse á consultora belga e con sede en Francia Bureau Veritas para que fixese unha auditoría na que non atopou problemas na calidade do ata este momento ensamblado polo estaleiro galego e considerouno “satisfactorio”.

“Sobre os rexistros e calidade da fabricación, montaxe e soldadura dos 16 bloques xa construídos e montados na grada do estaleiro, verificamos na nosa inspección que é satisfactoria, a pesar de ter bloques construídos e soldados por cinco talleres distintos. Estamos cun proxecto estrutural de baixo peso en rosca, con aceiro de alta resistencia e chapas de espesor reducido, e que constitúe unha solución tecnicamente válida para optimizar as capacidades de velocidade e autonomía dos buques”, sinalaba un dos puntos da auditoría.

Bureau Veritas apuntaba no documento que o tipo de deseño “exixe unha maior precisión nos procesos de ensamblaxe e soldadura, así como un control de calidade máis rigoroso durante a fabricación dos bloques, dada a maior susceptibilidade das chapas delgadas a sufrir deformacións e a presentar desviacións dimensionais que poden exceder as tolerancias admitidas pola normativa da Asociación Internacional de Sociedades de Clasificación” (IACS na súa sigla en inglés).

Atrasos na construción

Esta mesma semana o diario Búsqueda avanzou que a consultora deu conta de atrasos na construción ademais de incumprimentos no proceso de obtención dos certificados de bandeira uruguaia, un requirimento contemplado no contrato asinado a finais de 2023. No dito documento – Mario Cardama e o exministro uruguaio Javier García– establecíase que no momento da entrega dos buques terían que ser “matriculados a nome do comprador”, que asumiría os custos e, en todo caso, debería ser construídos aplicando a normativa vixente para “ser embanderados na República Oriental do Uruguai”.

Segundo publica a prensa uruguaia, o estaleiro galego non conseguiu cumprir con un dos fitos contractuais, en concreto, o da entrega a tempo dos motores Caterpillar, despois de que o provedor estadounidense cancelara o contrato. En febreiro do ano pasado o Banco da República Oriental do Uruguai, Álvaro García, realizou un ingreso a Cardama, emitido en forma de carta de crédito, por valor de 8,22 millóns de euros.

O Executivo uruguaio enviou á compañía os resultados da auditoría de Bureau Veritas, así como os problemas atopados na documentación relativa á garantía de reembolso (que neste caso é polo 10% do contrato, 8,2 millóns de euros) emitida pola empresa Redbridge Insurance Company.

Por agora Uruguai pagou case 29 millóns dos 82,87 presupostados para a construción dos buques. O primeiro anticipo, por un importe de 8,27 millóns, fixouse en decembro de 2024, ao que seguirían un pago polo mesmo importe polo cumprimento do primeiro fito, que se concretou en marzo, e un último de 12,34 millóns en xuño do ano pasado, unha vez foi notificada a colocación da quilla.