Urovesa entregará o próximo ano os primeiros prototipos do seu novo blindado para as Forzas Armadas.

Urovesa comezará a entregar ás Forzas Armadas os primeiros prototipos dos novos Vehículos de Exploración e Recoñecemento Terrestre (VERT), para os que o Goberno lle concedeu en outubro un préstamo de 132 millóns, en 2026. Así o apuntou o conselleiro delegado da compañía, Justo Sierra, tras a visita da ministra de Defensa, Margarita Robles, ás súas instalacións de Valga.

Segundo explicou Sierra, nas “próximas semanas” asinarase o contrato para o subministro dun centenar de vehículos VERT ás Forzas Armadas. Destaca que “é un contrato importante” ao ser de “longo prazo”, cunha execución ata 2030.

“A previsión é que seguramente imos estar entregando os primeiros prototipos o ano que vén, despois irá unha fase de preserie e acabaremos cunha intensidade maior de subministros no ano 2029-2030”, relatou Justo Sierra.

Remarca que os novos VERT “son vehículos cunha funcionalidade moi avanzada”, xa que “levan sistemas de obtención de información, cámaras moi especiais, sistemas de radio, estación meteorolóxica, antenas satelitais”.

Estes vehículos “moi complexos” contarán con uns sistemas tecnolóxicos que non fabrica Urovesa, pero que integrará da industria española para entregar o vehículo ao completo.

Os VERT están incluídos no Plan Industrial e Tecnolóxico para a Seguridade e a Defensa (PITSD). Este programa reforzará a capacidade operativa do Exército de Terra, co desenvolvemento dun avanzado sistema de exploración e recoñecemento baseado na plataforma VAMTAC ST5, un modelo que a empresa xa exporta a máis de vinte países. Forma parte do plan de modernización recentemente aprobado polo Ministerio de Defensa.

Pola súa parte, a ministra de Defensa, Margarita Robles, destacou o “gran traballo que está facendo Urovesa”, “que é un orgullo para a industria de defensa española”.

Tamén subliña “a importancia que ten investir en defensa”. “Dígoo sempre, é investir paz, seguridade, pero sobre todo postos de traballo, tecnoloxía”, afirma.

Tras visitar a planta de Urovesa e asistir a unha demostración de vehículos da empresa, a ministra agradeceu “moi especialmente” a Urovesa e a “todos” os seus traballadores o “esforzo” e “dedicación que poñen”. Nun luns no que Robles cumpre anos, destacou “o compromiso do Ministerio de Defensa de seguir investindo en defensa nos plans industriais para crear emprego, e para Galicia isto é unha industria importantísima”.

Ampliación de instalacións

Tal e como o propio Justo Sierra anunciou hai uns meses, Urovesa avanza tamén no seu proxecto de ampliación con 106.000 metros cadrados máis en Valga, o que suporá “duplicar capacidades”.

E é que esta ampliación suporá unha investimento de 52 millóns de euros, coa creación dun centenar de postos de traballo directos –duplica plantilla– e coa previsión de estar en funcionamento en 2029.

Sierra expón que este “ambicioso” proxecto de ampliación suporá “estar preparados” á demanda “cada vez máis intensa” do mercado de defensa español e internacional. “Pode darnos un salto tecnolóxico e industrial nos próximos tres ou catro anos”, di, que suporá converterse en “referente a nivel internacional e nacional dentro dos provedores do ámbito de seguridade e defensa”.

Calcula que se traducirá tamén na creación de entre 400 e 500 empregos indirectos na industria auxiliar, “moitos deles moi próximos a Urovesa” no ámbito industrial galego, aínda que tamén noutras comunidades como Asturias, País Vasco e Madrid.

Aumento da facturación ata os 150 millóns

Urovesa pechou 2024 con 122 millóns de facturación, un incremento do 12% respecto a 2023. Preguntado sobre as previsións para 2025, o responsable da compañía asegurou que é “probable” que se peche este exercicio en torno a 145-150 millóns de euros, preto dun 20% de aumento.

Finalmente, Justo Sierra agradeceu a visita de Margarita Robles e o traballo “moi próximo” con Defensa, o seu cliente “máis importante”. Así, abordaron tanto o plan de expansión da compañía como o novo proxecto dos VERT, “que ata agora eran vehículos que só fabricaban empresas moi grandes”.

Urovesa tamén subministra ás Forzas Armadas vehículos tácticos de posto de mando, unidades móbiles para sistemas de morteiro, así como vehículos NBQ para o recoñecemento de entornos contaminados.