Nestlé desmarca-se de Danone e ‘pasa’ de provisionar polas demandas do cartel do leite
O grupo que preside Pablo Isla considera que ten "argumentos xurídicos claros" para defenderse contra as reclamacións dos gandeiros así como para non reflectir "risgos significativos", aínda que outros grupos como Danone ou Lactalis optaron por provisionar.
Pablo Isla, novo presidente de Nestlé, ao lado dunha imaxe da fachada da sede do grupo suízo en España, en Esplugues de Llobregat, en Barcelona. Fotos de arquivo: EFE e Europa Press
Comentarios
En xullo do ano pasado, o Tribunal Supremo inadmitiu o recurso presentado por Nestlé contra a sanción de 6,8 millóns que lle impuxo a Comisión Nacional dos Mercados e da Competencia pola súa participación no denominado cártel lácteo, os intercambios de información entre os principais operadores do sector en España sobre o mercado de subministro de leite cru, é dicir, sobre o produto que mercaban aos gandeiros. Este revés, con todo, é só unha parte dos riscos que afronta a compañía que preside Pablo Isla, pois agora forma parte das industrias que están a recibir demandas das granxas polo teórico infraprecio que recibiron polo leite durante o período de actividade do cártel, entre o ano 2000 e o 2013. A pesar de que as reclamacións son numerosas, a filial española de Nestlé decidiu non dotar, por agora, provisións.
Así o indica Nestlé España nas súas contas anuais, nas que pon en cuestión a validez da resolución da CNMC e asegura que existen “argumentos xurídicos claros para defenderse contra as reclamacións xudiciais de danos para non ter que reflectir riscos significativos nos seus estados financeiros”. O grupo que capitanea Philipp Navratil recoñece que recibiu demandas por parte dos gandeiros e que realizou “unha estimación cuantificada dos posibles efectos”, sen que vexa risco dun impacto material nas contas de 2025.
As provisións da filial española, de feito, baixan no pasado exercicio, pois pasan de case 18 millóns a 15,7 millóns, cunha única dotación que está vinculada aos plans de pensións e pólizas do persoal. Si tiña reservado o grupo 6,8 millóns en provisións a curto prazo, cuxa función de cobertura non detalla, pero que coincide co importe que estaba en litixio no Tribunal Supremo.
As provisións de Danone e Lactalis
As estimacións dos despachos de avogados e de entidades que impulsan accións xudiciais de reclamación sitúan as indemnizacións potenciais en centos de millóns, pero o cálculo é realmente difícil. Aínda que sexa probable que os gandeiros teñan dereito a unha compensación, a estimación do dano ofrece cifras dispares nos distintos xulgados, que van desde un 2% ata un 9% do prezo do leite vendido durante o período de prácticas colusorias. Á súa vez, empresas e demandantes están a presentar unha batería de peritaxes nos procedementos, unhas para reducir ao mínimo a indemnización e outras para elevala. Todo iso fai difícil para as empresas calcular canto lles pode custar a súa participación no cártel.
Danone, nas súas contas de 2024, tiña provisionados 27,7 millóns cos que, consideraba, estaría cuberto o risco asociado á multa que lle impuxo a CNMC, de 20 millóns, e ás reclamacións recibidas. Naquel mesmo exercicio, Lactalis Iberia, a división española da multinacional francesa, tiña reservados 17,8 millóns para o cártel lácteo e para litixios fiscais por discrepancias con Facenda, cuxo risco estimaba nun máximo de 7,4 millóns. O grupo que máis leite recolle en España ten pendente de resolver un recurso no Supremo sobre a sanción que lle impuxo Competencia, de algo máis de 11 millóns. Á súa vez, outra filial da compañía recibiu unha sanción de máis de 10 millóns.
O perito de Nestlé
Nestlé está contrapondo ás reclamacións dos gandeiros un informe elaborado pola consultora Nera, no que rexeita que as condutas consideradas ilícitas afectasen os prezos. Segue unha pauta similar á do resto da industria sancionada, pois Lactalis contratou a Duff&Phelps e Kroll; Calidad Pascual a KPMG; Capsa a Frontier; ou Danone a RBB Economics.
Segundo recollen as sentenzas, o estudo de Nera para Nestlé utiliza unha serie de métodos comparativos para analizar a evolución dos prezos do leite cru de vaca en España, Francia e Portugal antes, durante e despois do período no que a CNMC identificou prácticas contrarias á libre competencia. Tras comparar os prezos en España no período comprendido entre 1997-2016 conclúe que non mostran un claro cambio durante o período dos intercambios de información respecto do que sucedía antes ou do que sucedeu despois.
Na comparativa internacional céntrase no mercado francés e no portugués, países cuxos mercados de leite cru de vaca están suxeitos á mesma normativa e desde os que España recibe a maior parte do leite importado. Conclúe que non hai claro cambio de patrón nos prezos relativos durante o período do cártel. Respecto aos marxes dos gandeiros sinala que non se aprecia efecto algún derivado dos intercambios de información.
