Abanca e Santander reforzan o seu poder en Galicia co fracaso da opa de BBVA ao Sabadell

• Abanca, entre os bancos afectados na trama de José Luis Moreno: o xuíz calcula un prexuízo de 1,5 millóns
• Escotet descarta a saída a Bolsa de Abanca a pesar de que "é un momento atractivo"

O naufraxio da opa de BBVA ao Sabadell deita por terra o nacemento da segunda maior entidade bancaria en Galicia, a que conformarían ambos grupos de producirse a integración ao sumar 180 oficinas na comunidade, polo menos, antes do axuste de rede por duplicidades. A integración tería un efecto similar no crédito a pemes, algo que preocupaba especialmente entre as organizacións empresariais galegas, incluída a patronal, que temían o recorte nas opcións de financiamento nun mercado bancario máis concentrado.

Abanca e o Santander, o banco que absorbeu o Popular e o Pastor, continuarán sendo os principais actores do sector en Galicia. No caso da herdanza das antigas caixas galegas, a súa hexemonía non estaba en dúbida, pois conta con 435 oficinas en territorio galego, case tantas como as que suman Santander, Caixabank, BBVA e Sabadell xuntos. A entidade que preside Ana Botín, sen embargo, si que podería quedar por debaixo da non consumada fusión. Conta con 142 sucursais en Galicia, segundo os últimos datos do Banco de España.

O ‘non’ de Abanca ao Sabadell

As turbulencias da opa hostil axitaron todo o sector. E Galicia non foi unha excepción. O presidente da Confederación de Empresarios, Juan Manuel Vieites, criticou a forma e o fondo da operación cando estaba en curso. Unha vez fracasada a segunda tentativa de Carlos Torres por engulir o Sabadell, considerou que é “unha satisfacción” e unha “boa nova”, pois o mundo empresarial necesita «todo o contrario» a unha concentración bancaria. A CIG, o principal sindicato na comunidade, estimou que a integración de BBVA e Sabadell recortaría uns 375 empregos na comunidade, mostrando, como o resto de centrais, o seu rexeitamento á fusión.

Abanca tamén se viu obrigada a saír á palestra para rexeitar unha posible fusión co Sabadell, unha manobra defensiva que permitiría ao banco catalán debuxar unha alternativa á opa de BBVA. Esta operación si que contarí­a co apoio do Goberno, así como do BCE, pero Juan Carlos Escotet descartouna o pasado maio, e reiterou a súa negativa na presentación de resultados de xullo. “Non tivemos conversas formais de ningún tipo co Sabadell nin nos interesa”, zanxou, alegando que Abanca só estaba interesada en adquisicións nas que manteña o control, como sucedeu ata agora con Eurobic ou Bankoa.

Tras o fin da opa, e co Sabadell reivindicando o seu camiño en solitario, no sector dan por feito que o banco que dirixe César González-Bueno, ex de Novagalicia, seguirá inmerso en rumores de fusión, polo que é probable que volva a atoparse no seu periplo con Abanca ou Unicaja, nun mercado cambiante e sen cargar cunha opa ás costas.

O mapa bancario galego

Tomando como referencia os datos do Banco de España de peche do primeiro semestre, BBVA conta con 116 oficinas en Galicia e o Sabadell con 64, as mesmas que a inicios de 2024. Entre os grandes bancos, son os únicos que non recortaron a súa rede na comunidade nese período. Unidos sumarían 180 fronte ás 142 do Santander e as 137 de Caixabank. Segundo a mesma fonte, ambas suprimiron unha sucursal desde inicios de 2024.

A nivel de implantación territorial, o mapa bancario galego ten a Abanca como gran dominadora. De feito, hai un centenar de municipios nos que é a única entidade financeira que opera. Conta con 435 oficinas, mentres que os outros catro bancos suman 459. Entre as cinco entidades acaparan o 89,85% da rede en Galicia, segundo o Banco de España.

O tropezón de Carlos Torres

Carlos Torres Vila, sucesor do chantadino Francisco González en BBVA e fillo de pontevedreses, lanzouse por o Sabadell tras dous intentos fallidos por integrar a entidade que preside Josep Oliu, un en 2020 que se saldou sen acordo e outro este mesmo ano que correu a mesma sorte polo rexeitamento do consello do banco catalán. Nin polo amistoso nin polo hostil conseguiu o seu obxectivo o enxeñeiro, fillo de pontevedreses e galego de corazón, segundo manifestou, aínda que nado en Salamanca. A operación para construír o novo xigante da banca española recibiu o rexeitamento do Goberno, da opada Sabadell e, finalmente, dos accionistas.

Incumprido o obxectivo, Torres Vila deu luz verde a unha chuvia de dividendos para compensar aos accionistas de BBVA e liberar en forma de retribución o capital reservado para absorber ao Sabadell. “Como parte do Plan Estratéxico, BBVA retoma de maneira inmediata o seu plan de retribución ao accionista: o 31 de outubro iniciará a recompra de accións pendente de preto de 1.000 millóns de euros; o 7 de novembro pagará o maior dividendo a conta da súa historia (0,32 euros por acción), por un total de aproximadamente 1.800 millóns de euros; e, en canto reciba a aprobación do Banco Central Europeo (BCE), poñerá en marcha unha significativa recompra de accións adicional”, dixo o banco. BBVA prevé repartir, en conxunto, uns 36.000 millóns entre os seus accionistas ata 2028.