Abanca gaña 902 millóns en 2025, case un 6% máis, sen contar o efecto da compra de EuroBic.

Abanca pon velocidade de cruceiro á súa conta de resultados e consolida o crecemento do seu beneficio sen o efecto EuroBic, que foi o que impulsou os seus gaños en 2024 por riba dos 1.200 millóns de euros. A entidade presidida por Juan Carlos Escotet asinou un 2025 con uns gaños de 902 millóns, crece en volume de negocio e reduce a morosidade. A entidade logra aumentar o beneficio ordinario, sen novas adquisicións, que contrasta co resultado récord de 2024, cando incorporou EuroBic; sen contar coa entidade lusa, ese exercicio o beneficio fora de 853 millóns. Polo tanto, o beneficio avanza un 5,8%

Abanca obtivo en 2025 unha rendibilidade ROTE do 15,1%. O resultado obtido baséase no crecemento eficiente do negocio e a boa xestión do balance, asegura a entidade de Escotet. “Con iso”, explica, “a entidade supera claramente os seus obxectivos de negocio e resultado para o ano, acreditando a súa capacidade para xerar ingresos recorrentes a través do seu modelo de negocio”.

Avanza o negocio ordinario

Así, Abanca presenta, entre outros parámetros, unha ratio CET1 do 14,1%, por riba do 13% definido como obxectivo; unha taxa de morosidade do 2,1%, mellorando o obxectivo do 2,5%; crece o volume de negocio un 6,1%, por riba da media do mercado, e con iso “gaña cota de mercado tanto no negocio de financiamento como no de prestación de servizos”, engade. O   ROTE do 15,1% é superior á franxa do 10-15% esperada polo equipo de Escotet.

O marxe bruto de Abanca o ano pasado, indicador clave do seu negocio, situouse en 2.156 millóns de euros cun avance do 3,8%. Con todo, o marxe de intereses, a diferenza entre a rendibilidade do seu activo, o que cobra polos créditos, e o que paga polos depósitos que capta, retrocedeu un 2,4%, ata os 1,597,5 millóns. O marxe básico mantívose por riba dos 1.700 millóns.

En 2025 a entidade elevou o seu volume de negocio por riba dos 136.000 millóns de euros e “o negocio continúa mostrándose robusto no conxunto da Península Ibérica”, di. O exercicio pechouse cun forte ritmo de captación de novos clientes en España e Portugal. Un total de 160.000 novos clientes incorporáronse á base de clientes de Abanca, con máis do 70% destas altas producidas fóra da zona na que é líder do mercado, o que supón un 17% máis que no ano anterior.

A integración de EuroBic

En 2024, Abanca lograra un beneficio atribuído de 1.203 millóns de euros, unha cifra récord que supuxo un crecemento por riba do 69% sobre os 711 millóns que asinara ao peche do 2023. Esa evolución tivo unha alavanca de crecemento extra, que non foi outra que a integración do portugués EuroBic. Sen contar co impacto na conta de resultados da adquisición da entidade lusa, Abanca gañara en 2024 uns 853,3 millóns.

Ese ano, en 2024, o resultado das actividades de explotación, o beneficio ordinario, en síntese, situárase en 873 millóns, unha significativa alza do 36,2% sobre os 641 millóns que gañara o exercicio precedente. Coa adquisición de EuroBic, a entidade de Escotet elevou o seu volume de negocio por riba dos 128.000 millóns e reforzou o seu perfil ibérico. A integración do banco portugués apuntouse con efectos de xullo de 2024.