Situación actual do mercado de operacións corporativas en España

A estas alturas do ano pódese aventurar que este mercado (M&A) en España está experimentando, durante 2025, unha moderación no número de transaccións, pero un aumento do total do capital mobilizado debido ás grandes operacións realizadas.

Algunhas das súas principais características nos últimos meses pódense resumir da seguinte maneira:

• Volume e valor: Os volumes transaccionados no mercado español de M&A mostran unha alta volatilidade, con fluctuacións mensuais significativas ao longo do ano en curso. Aínda que o número de operacións diminuíu (un 12% interanual nos primeiros 10 meses de 2025), o valor total do capital mobilizado aumentou considerablemente, impulsado polas grandes compravendas. Así, o volume de outubro de 2025, en comparación con outubro de 2024, aumentou un 11%¹.

Ata ese mes, realizáronse un total de 2.617 operacións en España neste exercicio, cun volume de 79.072 millóns de euros².

• Os factores relevantes actuais poden estruturarse nas seguintes categorías principais:

o Capital privado: O importante nivel de actividade de capital privado (private equity) no mercado está consolidándose.

o Grandes transaccións: As transaccións de gran escala están acelerando a recuperación do valor de mercado.

o Investimento internacional: O mercado español atrae a actores internacionais. Os sólidos fundamentos económicos do país (crecemento estimado do PIB en 2025: 2,9%^{3 e 6} e o crecemento dos beneficios corporativos están aumentando o seu atractivo para os investidores globais. As empresas cotizadas en España experimentaron un crecemento significativo dos seus beneficios que, no primeiro semestre de 2025 alcanzaron os 33.433 millóns de euros, un 4,45% máis que no mesmo período do ano anterior⁵. As previsións financeiras e económicas son positivas, e algúns analistas anticipan un potencial de crecemento adicional para certas valoracións.

• En canto ao mercado transfronteirizo, ata outubro de 2025, as empresas españolas elixiron EE. UU. e Portugal como os seus principais destinos de investimento, con 49 transaccións realizadas en cada país¹.

• Por outro lado, Reino Unido e Francia, con 156 e 138 respectivamente, son os países que máis investiron en España. En termos de volume, destaca EE. UU., cuxas empresas e investidores adquiriron participacións societarias por un valor total de 5.974 millóns de euros¹.

• Sectores clave:

– Inmobiliario. Mantén un volume de investimento considerable e un crecemento interanual do 3%. Así, realizáronse 556 transaccións nos primeiros nove meses do ano⁴.

– Tecnoloxía. Non é o sector líder no número de operacións, pero mantén unha sólida actividade un ano máis, con 233 investimentos completados. Os sectores de Internet, Software e Servizos TI destacan neste ámbito.

– Enerxías renovables. Os compradores están optando por adquisicións máis selectivas e estratéxicas, buscando optimizar as súas carteiras e asegurar proxectos clave en lugar dun crecemento masivo e inorgánico.

España. Perspectivas

O cuarto maior mercado da eurozona, con preto de 50 millóns de habitantes, está fortemente influenciado polo contexto europeo. Polo tanto, a actual incerteza macroeconómica na UE, especialmente das grandes economías como Alemaña, Francia e Italia, afecta a confianza empresarial e, en consecuencia, ao mercado de fusións e adquisicións. Tampouco axuda que se espere que a fortaleza mostrada polas economías ibéricas en 2025 se modere en 2026.

En calquera caso, para 2025 no seu conxunto, as perspectivas para este mercado son, en xeral, positivas. Espera-se un final de ano vibrante no mercado de fusións e adquisicións, que se viu impulsado pola perspectiva de moderación da inflación e a estabilización dos tipos de interese.