Besteiro critica a falta de “rumbo, planificación e proxecto” da Xunta: “Galicia perde tempo con este Goberno”

• Besteiro critica a falta de “rumbo, planificación e proxecto” da Xunta: “Galicia perde tempo con este Goberno”
• Besteiro acusa a Rueda de debuxar «unha Galicia irreal» e clama pola vivenda, a atención primaria e a industria

José Ramón Gómez Besteiro, secretario xeral do PSdeG, lamentou a falta de “rumbo, planificación e proxecto” do Goberno galego durante o seu discurso de réplica ao presidente da Xunta na primeira sesión do Debate sobre o Estado da Autonomía. “Hai inercia de xestión e melloras para que uns poucos, os de sempre, sigan vivindo ben”. 

Besteiro, que criticou que Rueda teña máis claro “contra quen quere confrontar” que “para quen ten a obriga de traballar”, sostivo que “non é aceptable unha presidencia sen rumbo”. Así, afirmou que o xefe do Executivo galego “parece ser máis un tertuliano que un presidente” nun contexto no que “os problemas acumúlanse e Galicia perde tempo” cun Goberno que, se algo transmite, é unha notable falta de impulso e sentido de país”.

O líder dos socialistas galegos instou a Rueda a poñer en marcha o “bono” que lle falta, o “bono goberno” e comezar a xestionar Galicia e a resolver os problemas dos galegos.

“O funcionamento é sinxelo: os cidadáns pagamos impostos e o goberno galego resolve os problemas”, afirmou o xefe de filas dos socialistas galegos durante o seu discurso de réplica ao máximo mandatario autonómico no debate sobre o estado da autonomía, no que lle afeou ao tamén líder dos populares galegos a súa “pobre acción política”. “Levan anos así: bono peixe, bono aluguer, bono cultural, sempre o mesmo. Moito anuncio e pouca solución”, sostivo.

“Non se pode ser ambiguo coa paz” 

O secretario xeral do PSdeG aproveitou, ademais, o inicio do seu discurso para emplazar ao presidente galego a “tomar posición” sobre a guerra en Irán. “Non se pode ser ambiguo coa paz”, manifestou o socialista, que propuxo un primeiro acordo para que Galicia “de exemplo cunha posición clara de ‘non á guerra’ e ‘si ao respecto internacional’ e ‘si ao apoio a un goberno que traballa pola paz'”.

Sobre este asunto, tamén lle reprochou ao presidente que Galicia “quede atrás” coas medidas para facer fronte ás consecuencias da guerra. “Mentres outros gobernos toman decisións, aquí levamos semanas escoitando excusas”, dixo para censurar, entre outras cuestións, que a Xunta venda “como un gran plan contra a guerra 157 millóns en investimentos xa previstos” entre os que se chegan a incluír, segundo sostivo, “reformas de pantaláns en portas ou axudas á sinalización do Camiño de Santiago”.

Crise da vivenda e atención primaria desatendida

Besteiro tamén aproveitou para preguntar a Rueda “se non sente un mínimo de vergoña ao saber que baixo o seu mandato hai máis galegos que nunca que non poden acceder a unha vivenda, a un médico ou a unha residencia” e afeoulle que tras 17 anos na Xunta en PP non fose capaz de planificar un parque público.

Dito isto, volveu reprochar as listas de espera da sanidade a Rueda, nun contexto no que “a atención primaria está desbordada e desatendida”. “Somos a segunda CCAA que menos inviste en atención primaria, só por detrás do Madrid da señora Ayuso”, criticou para soster que a sanidade pública está a pagar “a falta de planificación” da Xunta. “Como se explica que, tendo máis recursos, haxa un peor acceso á sanidade?”, preguntouse para asegurar que “aquí ou houbo falta de planificación ou o que se planificou foi o desmantelamento da sanidade”.

En materia de educación, ademais, Besteiro reclamou un plan de choque de emprego e un plan de infraestruturas educativas e volveu defender a gratuídade da primeira matrícula nos másteres e un incremento estable e suficiente da financiación universitaria.

Todo iso antes de criticar tamén ao Goberno galego que, en dependencia, “sustitúa dereitos por bonos que non resolven nada”.

Peche “definitivo” do proxecto de Altri

Na súa intervención, ademais, o xefe de filas dos socialistas galegos lamentou que Galicia avance só por “inercia” debido a que, aínda que ten “potencial”, falta impulso por parte da Xunta. “Vostede confunde gobernar con anunciar, e o resultado é unha política industrial sen rumbo e sen planificación”, dixo para poñer como exemplo os proxectos industriais estratéxicos: “inventaron unha vía rápida e deixárona en punto morto”, afirmou.

Tras iso, referiuse ao “fracaso de Altri” como “o exemplo máis claro do seu modelo”. “Faga un favor a Galicia e peche definitivamente este proxecto e faga público o acordo oculto”, trasladou nunha intervención na que se referiu ao anuncio de Rueda de ampliar o capital de Recursos de Galicia para esixir transparencia con esta sociedade á Xunta.

O xefe de filas do PSdeG, que abordou tamén a crise do sector primario, asegurou que os datos “desmontan o discurso” de Rueda: “Menos produción, menos consumo, menos explotacións e menos futuro”.

Tamén afeou a negativa da Xunta a negociar o modelo de financiación autonómica e a condonación da débeda mentres se deixan de ingresar millóns de euros polas rebaixas fiscais do Goberno galego. “Diñeiro que non aparece nin en sanidade, nin en vivenda nin en educación. Isto empeza a ser un verdadeiro problema”, dixo para asegurar que “é imposible xestionar un país se non se ten unha mínima visión de conxunto do seu territorio”.

E é que, segundo sostivo, para o PPdeG “Galicia non é un país diverso e interconectado, senón que máis ben é un mapa cheo de problemas soltos que van atendendo segundo os van atopando”.

Autoestradas galegas

Dito isto, referiuse á situación das autoestradas galegas para volver reclamar a gratuídade das vías autonómicas que actualmente teñen peaxes e aproveitou tamén para afeitar a falta de planificación para facer fronte aos incendios.

O socialista advertiu de que este abandono ten consecuencias directas, tamén na xestión do lume, cun dispositivo que “chega tarde e sen previsión”. “O que non se planifica no inverno, arde no verán”, resumiu.

O socialista concluíu avanzando varias das propostas de resolución que o Grupo Socialista defenderá no debate de política xeral e que abarcan desde a reforma da atención primaria ata a intervención no mercado da vivenda, a planificación industrial, o reforzo do sector primario, a negociación da débeda ou un novo marco de financiación para Galicia.

“Galicia non necesita máis bonos nin máis anuncios, necesita un goberno que asuma a súa responsabilidade”, sinalou Besteiro, que rematou asegurando que “a metade do bono goberno xa está cumprida, porque a xente paga impostos”. “Agora falta que vostede cumpra a súa parte”, rematou.