Besteiro denuncia os “bulos” da dereita contra o feminismo: “Non é o problema, é a solución”
O secretario xeral dos socialistas galegos advirte de que, xunto ás desigualdades económicas, están a aparecer novas formas de violencia e control, especialmente entre a xente nova.
O secretario xeral do PSdeG, José Ramón Gómez Besteiro, nunha manifestación polo 8M en Vigo
Comentarios
José Ramón Gómez Besteiro, secretario xeral do PSdeG, criticou este 8 de marzo, Día Internacional da Muller, os “bulos” e a “violenta campaña” da dereita en medios e redes sociais que veñen o feminismo “como un problema”. “Para nada. O feminismo é a solución”, reivindicou.
Así se pronunciou ante os medios ao inicio dunha manifestación celebrada esta mañá en Vigo, na que participou xunto a outros cargos do partido en Galicia e tamén militantes. O bloque socialista suxeitou unha pancarta que abogaba pola abolición da prostitución: “Contra a explotación das mulleres, abolición”.
Non responde á realidade social
Para Besteiro, o debate alimentado “non responde á realidade social”, que enmarcou nun contexto de desigualdade no que, por exemplo, en Galicia as mulleres cobran de media 4.706 euros menos ao ano que os homes, segundo recordou.
O líder socialista advertiu tamén de que, xunto ás desigualdades económicas, están a aparecer novas formas de violencia e control, especialmente entre a xente nova. Neste sentido, lembrou que o 27% das mozas recoñece que a súa parella controla o seu móbil, mentres que o 99% das vítimas de contidos sexuais falsos en internet son mulleres.
Neste contexto, Besteiro reivindicou o feminismo como unha “ferramenta necesaria” para defender dereitos e combater a discriminación. “É o día de loitar contra esa desigualdade e o feminismo é o camiño para as mulleres e para os homes tamén”, reflexionou.
