Ferraz recibe unha denuncia contra o presidente da Deputación de Lugo por acoso.
A dirección federal do PSOE asegura que o caso está nas mans da Oficina contra o Acoso mentres que José Tomé anunciou unha comparecencia pública este mércores para explicar a situación.
O presidente da Deputación de Lugo, José Tomé, na súa comparecencia na Comisión de Orzamentos do Parlamento de Galicia – PARLAMENTO DE GALICIA
Comentarios
A dirección federal do PSOE recibiu este luns 8 de decembro unha denuncia “anónima” contra o presidente da Deputación de Lugo, José Tomé. Así o confirman á axencia Europa Press unhas fontes socialistas que defenden que o caso está en mans da Oficina contra o Acoso.
A denuncia recibida polo canal interno que Ferraz puxo á disposición de posibles vítimas describe “comportamentos machistas” do dirixente socialista segundo describen outras fontes socialistas consultadas por Europa Press que aseguran que o PSOE é o “primeiro interesado” en que o caso se resolva. O PSdeG, pola súa parte, asegura non ter constancia desta denuncia en contra do tamén secretario provincial de Lugo e alcalde de Monforte.
Esta nova denuncia enmárcase na escalada da crise provocada polo caso Salazar despois de que dúas mulleres presentaran sendas denuncias en Ferraz por comportamentos inadecuados do exdirixente do Goberno e do PSOE, Francisco Salazar. A crise desatouse pola tardanza do PSOE en contactar coas denunciantes, coas que non contactou ata pasados catro meses de que trasladaran o seu caso ao partido, ata o punto que o presidente e secretario xeral, Pedro Sánchez, chegou a asumir “en primeira persoa” a responsabilidade.
José Tomé comparecerá ante os medios este mércores
No caso de José Tomé, a situación saíu á luz despois de que o programa Código 10 do canal de televisión Cuatro publicase este martes que o canal interno habilitado polo Partido Socialista para comunicar casos de acoso recibira un total seis denuncias internas que alertan de supostos casos de acoso a mulleres vinculadas co partido por parte de Tomé.
Consultadas ao respecto, fontes do PSdeG teñen sostido que non teñen constancia de “ningunha denuncia” contra o dirixente do partido en Lugo e que tiveron que esperar a ver o programa de televisión para coñecer os feitos que se lle atribúen.
Estas fontes, ademais, lembran que o partido habilitou un canal interno, xestionado por persoal externo, no que se garda a confidencialidade tanto do ou da denunciante como da persoa denunciada e que na mañá deste mércores non tiñan ningunha información oficial sobre este asunto.
Preguntado ao respecto por Europa Press, o propio José Tomé remitiuse a unha comparecencia nos medios que terá ás 11:30 horas deste mércores no Concello de Monforte.
