O alcalde de Ourense manda «á merda» aos xornalistas antes de declarar por malversación
Pérez Jácome está investigado polo suposto desvío de fondos públicos á súa televisión privada, Auria TV, tras a denuncia presentada perante a Fiscalía polo seu antigo asesor, José Manuel Palacios.
El alcalde de Ourense, Gonzalo Pérez Jácome, acompañado de su abogado y de la concejala de Dinamización y Política Social, Noa Rouco, a la salida del juzgado después de haber sido citado a declarar – EUROPAPRESS
Comentarios
O alcalde de Ourense, Gonzalo Pérez Jácome (Democracia Ourensana), declarou este luns no Xulgado de Instrución número 1 de Ourense, onde está sendo investigado por un suposto delito continuado de prevaricación administrativa e malversación de fondos públicos. A causa partiu dunha denuncia á Fiscalía de Ourense por parte do exasesor do grupo de Goberno de Democracia Ourensana, José Manuel Palacios. O Xulgado trata de determinar se o rexedor, que chegou ao cargo en dúas ocasións co apoio do PP a cambio de ceder a Deputación de Ourense aos populares José Manuel Baltar primeiro e a Luis Menor agora, desviou fondos á súa televisión privada Auria TV.
Pérez Jácome negouse a facer declaracións na entrada do xulgado, onde o esperaban os medios de comunicación. Chegou acompañado do seu avogado e da concelleira de Dinamización e Política Social, Noa Rouco, e despachou aos xornalistas cun “ides á merda”.
A denuncia contra o alcalde, á que tivo acceso Europa Press, inculpa a Pérez Jácome pola adquisición de “material técnico inventariable” por un valor de “3.946,29 euros” dentro dun pedido “financiado con fondos municipais” de “8.698,04 euros” totais. O denunciante salientaba que o material foi utilizado “exclusivamente” en “actividades vinculadas” a Auria TV, un “canal privado vinculado ao alcalde”, e tamén lle atribúe ter recorrido a funcionarios municipais para “desempeñar funcións exclusivas como cámara” no canal de televisión, que son “alleas ás competencias propias” do cargo.
Contratación dun asesor
O denunciante sinalaba que a contratación dun asesor político do grupo de goberno, Germán L., como cámara “desde abril de 2021” ata a data da denuncia (decembro de 2024), ascendía a “178.930 euros” para o “pago do salario e cotizacións sociais”. Palacios incidía en que os “contidos institucionais” da administración municipal, “como vídeos de plenos municipais, roldas de prensa e outras actividades oficiais”, “non están dispoñibles” nas súas plataformas oficiais, senón que “son difundidos de maneira exclusiva a través de Auria TV”.
Seguidamente, a denuncia destacaba que isto supón unha “vulneración” dos “dereitos cidadáns” de “acceso igualitario á información”, así como dos “principios fundamentais” de transparencia e “imparcialidade”, “en beneficio de intereses privados” e “en detrimento do interese xeral”.
Entre as demandas, o exasesor do Concello de Ourense solicitaba a suspensión da “centralización da comunicación institucional en plataformas privadas”, mentres se tramita a investigación, e garantir que “os recursos do Concello non continúen sendo utilizados para fins privados”.
