O PP galego arremete contra o BNG: «Pagan salarios para que haxa máis manifestacións e máis alboroto»
A secretaria xeral do PPdeG, Paula Prado, acusa ao BNG de "dar un paso máis na súa estratexia de conflito" e de botar man dunha "chamada caixa de resistencia".
Paula Prado, secretaria xeral del PPdeG
Comentarios
O PPdeG eleva o ton contra o BNG. A súa secretaria xeral, Paula Prado, acusou á formación nacionalista de “dar un paso máis na súa estratexia de conflito” ao “pagar salarios para que haxa máis manifestacións e máis alboroto”.
Segundo Paula Prado, “o sindicato do BNG, a CIG, activou por primeira vez nunha folga do sector da educación a súa chamada caixa de resistencia”. A súa xuízo, o “partido independentista está tan desesperado por estimular o conflito, por crear unha sensación de malestar en Galicia“, que “xa ofrece un salario por ir á folga”.
“Todos sabemos desde hai tempo cal é a estratexia do BNG: manifestación e alboroto. Pero agora deron un paso máis e pagan para que haxa máis manifestacións e máis alboroto”, censurou.
Neste sentido, a número dous dos populares galegos denominou Bloque Negacionista Galego ao BNG e criticou que a súa “única proposta” segue sendo “o non a todo”. “O seu discurso é dicir que todo vai mal, xerar crispación e crear a idea de que nada funciona”, engadiu.
“Mentres o PPdeG ten Orzamentos para traballar polo benestar dos galegos e das galegas, os ‘presupostos’ do independentismo galego só van para pancartas e algarada”, concluíu.
A resposta de Pontón
Por outra banda, Ana Pontón negouse a responder aos “bulos do PP“. “Bulos tras bulos, semana tras semana”, dixo nunha rolda de prensa na que a voceira nacional do BNG criticou os “recortes” da Xunta en Atención Primaria e a falta de fondos autonómicos para o Servizo de Axuda no Fogar (SAF).
“Se solucionasen os problemas da Atención Primaria sería moito mellor que seguir atacando con bulos, mentiras e cousas tan ridículas como estas, que só retratan a un PP desesperado polo avance do BNG“, trasladou.
