O TSXG admite a trámite o recurso do BNG para acceder aos acordos de Altri coa Xunta.
A voceira nacional do BNG, Ana Pontón, afirma que o Goberno de Rueda "leva dous anos agochando os seus acordos secretos con Altri" e que por iso acudiron aos tribunais para "poñer luz onde o PP quere poñer escuridade".
A voceira nacional do BNG, Ana Pontón.
Comentarios
Ana Pontón, voceira nacional do BNG, anunciou que o Tribunal Superior de Xustiza de Galicia (TSXG) admitiu a trámite o recurso contencioso-administrativo presentado polo BNG, para acceder aos “acordos secretos” asinados entre a Xunta e Altri, en particular, ao memorando de entendemento asinado en outubro de 2021 entre a empresa e a actualmente disolta Sociedade Impulsa.
“O Goberno de Rueda leva dous anos agochando os seus acordos secretos con Altri, por iso tivemos que recorrer á xustiza, para poñer luz onde o PP quere que haxa opacidade e esperamos poder ter acceso a ese acordo que foi asignado pola Xunta”, apuntou Pontón durante un acto en Sarria.
Tamén afirmou que o “empeño” do PPdeG de “esconder” o pacto con Altri é “unha proba de que ese pacto favorece á macrocelulosa pero prexudica a Galicia, sobre todo á xente do rural e do mar”.
O documento, indicou o BNG, foi subscrito polo que, naquel momento, era presidente da Sociedade Impulsa, vicepresidente segundo e conselleiro de Economía, Empresa e Innovación, Francisco Conde.
O BNG denunciou os cambios legais que os populares “fixeron á medida da empresa lusa” despois do pacto de 2021, incluída unha indemnización patrimonial se o proxecto fracasa.
Outras ameazas
Con todo, Pontón afirmou que Altri “non é a única ameaza” para manter un rural vivo, en referencia ao acordo UE-Mercosur que conta co “apoio entusiasta do PP”.
Un acordo que sitúa aos produtores galegos de carne nunha “situación de competencia desleal”, ao estar sometidos a estándares ambientais, sanitarios e de benestar animal “máis estritos que nos países do Mercosur”.
“Non apoiamos o acordo de Mercosur, porque deixa ao noso sector agrogandeiro nunha situación de indefensión e isto pasa cun goberno de Rueda cruzado de brazos que abandonou aos nosos gandeiros, ao contrario, o PP votou a favor deste acordo no Parlamento Europeo, ao igual que o PSOE”, rematou Pontón.
