Rueda celebra as medidas do Goberno, pero critica a falta de diálogo coas comunidades

• Rueda aposta polo «non á guerra» e clama contra as «conveniencias persoais de Sánchez»
• O Goberno cre que a Xunta quería financiar a Altri «a fondo perdido» sen poñer «un só euro»

O presidente da Xunta move ficha tras os anuncios do Goberno no Consello de Ministros deste venres. Alfonso Rueda agradeceu este venres que “por fin” o Goberno que dirixe Pedro Sánchez impulsase un plan con medidas para paliar os efectos económicos pola guerra de Irán, aínda que lamentou que o faga sen ter falado previamente coas comunidades, que tamén sufriran as consecuencias.

En declaracións aos medios en Xunqueira de Ambía, Rueda lamentou que os españois estean xa “acostumándose ao que nunca vai ser normal”, en referencia a que “haxa que suspender un Consello de Ministros, aprazalo durante horas, porque os ministros (do PSOE e Sumar) non son capaces de poñerse de acordo entre eles”.

“Xa chamaba a atención por calquera asunto, pero ademais que ocorra cando se reúnen de forma extraordinaria para falar de algo tan importante como as medidas que hai que tomar para paliar os efectos que está a ter a guerra no Oriente Medio explica ben ás claras como están as cousas. Cando dicimos que non hai goberno, despois eles encárganse de darnos a razón”, incidiu.

Dito isto, sobre as medidas, apelou a coñecelas “en profundidade” antes de opinar, pero recalca que “era necesario tomar medidas”. “Se se tomaron e son boas, hai que aplaudilas”, admitiu, pero tamén reprobou que o Executivo de Sánchez non as falase coas comunidades.

“O último Goberno en Europa” en actuar

Neste sentido, o mandatario autonómico destacou que aínda que as medidas fiscais podían ser as máis necesarias para a cidadanía, as que se propoñen inciden “tanto no Estado como nas comunidades”. “Vai impactar a nós, como mínimo, igual que ao Goberno e, probablemente máis, porque xa coa guerra de Ucraína, a quen nos afectou foi moito máis ás comunidades que ao propio Goberno”, manifestou.

Tras esta reflexión, concluíu que, precisamente por iso, “o lóxico” era “ter falado e poñerse de acordo entre todos”. Ao seu xuízo, se os cidadáns necesitan medidas, hai que adoptalas, pero “non ten ningún sentido que se tomen desde Madrid” e que, quen sofre as consecuencias, as comunidades, se teñan que enterar “como sempre pola prensa”.

“Lamento este empeño, primeiro, en non poñerse de acordo entre eles e, segundo, non querer falar coas comunidades. Galicia, desde logo, ía estar de acordo porque é necesario”, insistiu, antes de afeárlle ao Executivo estatal que non se comporte “cunha lealdade institucional mínima”. “En todo caso, alégrame que por fin o Goberno mova ficha. Xa era case o último Goberno en Europa en adoptar medidas. Aínda que fose tan accidentado e discutido entre eles, polo menos fan algo, e iso é de agradecer”, rematou.