Xulio Sacristán, histórico alcalde de Culleredo, falece aos 71 anos

Duelo no PSOE galego polo falecemento de Xulio Sacristán. O que fose alcalde de Culleredo por máis de tres décadas (1983-2017) e secretario xeral do PSOE provincial (2014-2017) faleceu este martes aos 71 anos de idade.

Segundo a axencia Europa Press, Xulio Sacristán será velado no tanatorio de Almeiras, pertencente a un Concello de Culleredo que publicou unha mensaxe nas súas redes sociais na que “lamenta profundamente” a morte de Xulio Sacristán e informa de que, en sinal de respecto e recoñecemento á súa entrega ao servizo público, declárase loito oficial e que as bandeiras ondearán a media hasta.

“Expresar as nosas condolencias á súa familia, amizades e persoas próximas. O seu legado permanecerá sempre na historia de Culleredo”, apunta o Consistorio.

Así mesmo, o secretario xeral do PSdeG, José Ramón Gómez Besteiro, publicou unha mensaxe no seu perfil da rede social X na que trasladou o seu pesar polo falecemento de Sacristán. “Hoxe despedimos a Xulio Sacristán, eterno alcalde de Culleredo e un bo compañeiro e amigo. Un dos que sempre estivo, que traballou pola súa xente con humildade, dignidade e lealdade aos valores que nos unen”, sinala Besteiro, que asegura que “deixa pegada, memoria e exemplo”.

O presidente da Deputación da Coruña, Valentín González Formoso, publicou outra mensaxe na que mostra o seu pesar. “Un día moi triste. Xulio Sacristán foi un alcalde de referencia, unha figura clave no desenvolvemento de Culleredo e da área metropolitana da Coruña”, sinala Formoso, que asegura que se vai “un socialista comprometido, un traballador incansable e un gran amigo”.

“As miñas condolencias á súa familia e amizades”, trasladou, en liña coa agrupación provincial da Coruña do PSOE, que o definiu como “un alcalde de referencia socialista que marcou a historia política e social de Culleredo durante máis de tres décadas”.

“O seu compromiso inquebrantable co progreso e o benestar dos veciños converteuno nun referente do socialismo local, loitando incansablemente por cuestións fundamentais para o desenvolvemento da área coruñesa”, sinala. O PSOE coruñés destaca que, durante a súa dilatada traxectoria á fronte do Concello de Culleredo, Sacristán conseguiu dotar de unha figura administrativa sólida á institución municipal e conseguir unha ampla serie de equipamentos para todas as parroquias do municipio.

“Aqueles que o coñeceron destacan del o seu carácter de traballador incansable e, por riba de todo, a súa condición de boa persoa, valores que sempre guiaron a súa acción política e o seu compromiso co socialismo”, sinala. Así, o actual secretario provincial do PSOE provincial da Coruña lamenta profundamente o falecemento do exrexedor. “Xulio Sacristán foi un compañeiro exemplar e un socialista comprometido que dedicou a súa vida ao servizo público e ao benestar dos seus veciños de Culleredo. O seu legado perdurará como testemuño do que significa o verdadeiro compromiso socialista”, indica.