O PSdeG rearmase para facer un "proxecto realista, galeguista e centrado na maioría social"

O secretario xeral do PSdeG aposta por configurar un “proxecto realista, galeguista e centrado na maioría social”. José Ramón Gómez Besteiro convocou aos coordinadores dos 15 grupos de traballo que a Comisión Executiva Nacional Galega acordou crear o pasado mes de abril, para construír formalmente os foros arredor dos que o partido quere configurar un “proxecto realista, galeguista e centrado na maioría social”.

Besteiro aposta por este movemento co “obxectivo claro” de compartir ideas e elaborar propostas para construír unha “alternativa de futuro”. Tras a configuración dos grupos, os socialistas galegos “queren escoitar máis voces, unir máis miradas e construír máis Galicia”.

O líder dos socialistas galegos valorou o perfil dos 173 socialistas de toda a comunidade que se integraron no proxecto ao longo das últimas semanas. “Son xente de todas as idades, con experiencia en sanidade, educación, rural, empresa e coidados”, detallou Besteiro ao tempo que ensalzou que se trata de persoas “comprometidas, que coñecen a realidade e que queren construír”. “Este proceso xa está en marcha e agora abrímolo a toda a sociedade”, apuntou Besteiro.

A distribución dos grupos

Deste xeito, os grupos quedarían compostos con Silvia Fraga á fronte do de Igualdade; Abel Losada, Sector Económico; Natalia González Benéitez, Política Social; Julio Torrado, Sanidade; Fabián Canosa, Educación; Silvia Longueira, Cultura e Lingua; Roberto Fernández Rico, Monte; José Ramón Romero, Mar e Recursos Mariños; e Ramón Alonso, o de Medio Ambiente e Emerxencia Climática.

Así mesmo, o grupo Transportes e Mobilidade, é responsabilidade de Patricia Otero; Memoria Histórica de Iván Puentes; o de Vivenda, de Iria Sobrino; o de Deportes, de Jorge Bustos; o de LGTBI, de Aitor Rodríguez Casanova; e o de Europa, de Nicolás González Casares.