Rueda critica a falta de comunicación de Transportes tras reducir a velocidade no AVE entre Ourense-Santiago.
O presidente da Xunta sinala que "hai uns días" a Xunta reclamou explicacións por estas decisións e, por agora, "non houbo ningunha contestación".
O titular do Goberno galego, Alfonso Rueda, comparece ante os medios tras o Consello da Xunta. – XUNTA
Comentarios
Alfonso Rueda pide ao Ministerio de Transportes que aclare os motivos polos que tomou a decisión a semana pasada de reducir a velocidade de 300 quilómetros por hora a 220 quilómetros por hora nun tramo da liña ferroviaria Ourense-Santiago por avisos de maquinistas polo estado da vía e critica ao equipo de Óscar Puente por “non ter tido ningunha contestación” ás explicacións solicitadas hai varios días.
Así o apuntou este luns na rolda de prensa posterior á reunión semanal do Consello na que asegurou que “non hai ningunha” interlocución con Transporte. Únicamente, apuntou, este domingo o máximo responsable de Renfe na Comunidade púxose en contacto coa Administración autonómica para trasladar as medidas en materia ferroviaria debido ás consecuencias do temporal.
De feito, Adif puxo unha limitación temporal de velocidade a 160 quilómetros por hora a consecuencia do temporal de choiva e vento que azouta a Galicia.
Neste contexto, o presidente galego espera ter unha resposta a esa demanda esta semana, tras lembrar tamén que Puente “comprometeuse” a manter unha reunión solicitada “hai dous anos” para falar da evolución da actividade do seu Ministerio, de Renfe e de Adif.
De seguir “sen ningún tipo de comunicación nin de explicación” por parte de Transportes, Rueda apunta que o Executivo autonómico “tería que acabar actuando”, pero cre que estaríamos “ante un Estado fallido” se a Xunta “ten que actuar para ver unha infraestrutura estatal”. “Eu prefiro pensar que o meu país funciona minimamente”, esgrimiu antes de insistir en reclamar explicacións e “que se fagan os estudos que sexan necesarios”.
Explicacións de Óscar Puente
Nesta liña, preguntado polas declaracións do líder do PP nacional, Alberto Núñez Feijóo, pedindo a dimisión de Óscar Puente acusando ao Goberno de “encher de datos para confundir”, o tamén líder dos populares galegos defendeu que “comparecer moitas veces non é suficiente”.
“Cando se comparece hai que ter en conta o contido da comparecencia. A miña sensación é que a día de hoxe, unha semana despois do accidente de Córdoba e dos que sucederon despois, todo é moito máis confuso e esa confusión vén das contradicións e falta de concreción que están provocando as declaracións do ministro e dos altos cargos do seu Ministerio”, asegurou Rueda.
Nesta liña, lamentou que “en lugar de tranquilizar á poboación”, na súa opinión, o Executivo central “introduce moitos temores”.
“Báixase a velocidade en Galicia, non se podía e estaba facéndose poñendo en perigo a seguridade dos viaxeiros? Non pasa nada? Creo que non é suficiente. O Goberno está intentando dicir que con comparecer chega. Comparecer é aclarar e non ocultar e creo que se está facendo todo o contrario”, zanxou.
