O Goberno di que a AP-9 está «na vía da gratuidade» a horas de que expire o prazo de Bruxelas para acudir ao TJUE

Pedro Blanco, Delegado do Goberno en Galicia, afirmou que a AP-9 está “na vía da gratuidade”. Estas palabras chegan a menos de 24 horas de que expire o prazo concedido por Bruxelas para non levar a prórroga da concesión ante o Tribunal de Xustiza da UE (TJUE).

O pasado xullo a Comisión Europea enviou un ultimato ao Executivo central para que emende as irregularidades polas que foron prorrogadas as concesións dos peaxes nas autopistas AP-66 e AP-9 e que, aos ollos de Bruxelas, vulneran as regras da Unión Europea en materia de contratación pública e de concesión de autopistas. Un asunto que, de non resolverse no prazo de dous meses (que expira este mércores), os servizos comunitarios poderán elevar ao TJUE.

Preguntado por este tema, Blanco saíu ao paso este martes en Vigo asegurando que aos usuarios o que lles interesa é circular pola estrada de forma gratuíta, non de quen é a titularidade da mesma.

Segundo el, foi o Goberno de Pedro Sánchez o que “iniciou o camiño da gratuidade” da AP-9, insistindo en que se a autopista pasa a ser da Xunta ou é rescatada polo Executivo central non implicaría que automaticamente sexa gratis.

“Estamos cun sistema de bonificacións nunca visto, e ademais hai que dicir que este Goberno puxo en marcha, e polo tanto eu creo que iso é importante. O outro está enriba da mesa e veremos que é o que se fai finalmente”, reivindicou.