Inditex recomprará accións por 180 millóns para cumprir cos seus compromisos con directivos e plantilla.
O grupo téxtil pon en marcha este programa polas obrigas de entrega de accións ao persoal contraídas dentro do seu plan de incentivos a longo prazo.
Sede central de Inditex en Arteixo. Foto: Batlle i Roig
Comentarios
O consello de administración de Inditex aprobou este mércores un programa temporal de recompra de accións propias que afectará a un máximo de tres millóns de títulos, representativos do 0,096% do seu capital social, e cun importe máximo de 180 millóns de euros, segundo informou este mércores á Comisión Nacional do Mercado de Valores (CNMV).
A finalidade de dito programa é permitir á compañía cumprir coas obrigas de entrega de accións a determinados membros do equipo directivo, incluídos os conselleiros executivos, e outros empregados do grupo, derivadas do primeiro e segundo ciclo do plan de incentivo a longo prazo 2023-2027, aprobado pola xunta de accionistas do 11 de xullo de 2023, así como do primeiro e segundo ciclo do plan de incentivo a longo prazo 2025-2029, aprobado pola xunta do 15 de xullo de 2025.
Compra a prezos de mercado
As accións compraránse a prezo de mercado, respectando as condicións de prezo e volume establecidas no Regulamento (UE) 2016/1052 e con suxeición aos termos autorizados pola xunta xeral de accionistas.
En concreto, a execución do programa realizarase en dous tramos: o primeiro tramo de 1,6 millóns de accións, adquirirase entre o día 5 de febreiro e o 31 de marzo de 2026; mentres que o segundo tramo de 1,4 millóns de accións, adquirirase entre o 1 de maio e o 30 de xuño de 2026.
A interrupción, finalización ou modificación do programa, así como as operacións de compra de accións realizadas en virtude do mesmo serán debidamente comunicadas á CNMV. BBVA será o intermediario que realizará a adquisición de accións por conta da compañía.
