Navantia inicia en Ferrol as obras da Fábrica Dixital de Bloques

Navantia comezou coa colocación dos primeiros piares no estaleiro de Ferrol da que será a súa nova Fábrica Dixital de Bloques. Esta estrutura traerá consigo un novo modelo de produción no que a compañía pública investe 110 millóns de euros.

Estes primeiros piares corresponden a un dos tres módulos dos que constará o complexo, o de aceiros –os outros son armamento e volteo–.

Esta fase da construción da nova fábrica prolongarase durante os próximos 12 meses e nela, segundo informou o grupo, utilizaranse 7.750 toneladas de aceiro. O triplo do que se emprega na construción dunha fragata de última xeración.

A fábrica terá unha estrutura rectangular, con medidas aproximadas de 500×90 metros e unha superficie construída de uns 45.000 metros cadrados.

Navantia sinalou que cumpren os prazos fixados inicialmente e que a fábrica estará terminada en 2025 para poder entrar en funcionamento en 2026.

A Fábrica de Bloques, detallou Navantia, é unha planta totalmente dixitalizada, automatizada e robotizada, coa “tecnoloxía máis avanzada” para optimizar os procesos e reducir os prazos de entrega.

Este novo modelo produtivo para os bloques dos buques irá avanzando “de estación en estación” e empregará a 300 persoas en cada unha delas.