Asociación de Alcohólicos Rehabilitados de Pontevedra: máis de 30 anos axudando a superar a adicción.

O pasado 15 de novembro conmemorouse o Día Sen Alcohol, iniciativa impulsada pola Organización Mundial da Saúde na que se invita a reflexionar sobre os riscos e danos á saúde física e psicolóxica que provoca o consumo de alcohol, promovendo así a responsabilidade sobre o seu consumo. O traballo de asociacións resulta fundamental para ofrecer orientación a quen busca superar a adicción, promovendo a reintegración social e hábitos de vida máis saudables. Unha delas é a Asociación de Alcohólicos Rehabilitados de Pontevedra (ARPO “Manuel Pérez”), que desde 1993 brinda apoio non só aos enfermos, senón tamén aos seus familiares.

ARPO foi unha das beneficiarias da última edición do Plan Social de Ence. Segundo explicou Nina Ferreiro, psicóloga clínica da asociación, a Economía Dixital Galicia, desde hai anos reciben o apoio deste programa que consideran “imprescindible” para continuar axudando ás persoas que o necesiten. “Moitos dos asociados que temos están en paro ou nunha situación económica precaria. Outros colaboran con pequenas doazóns, por exemplo, para limpezas. O demais é todo a base de achegas ou subvencións”.

Segundo detallou Nina Ferreiro, grazas a ese apoio a asociación pode desenvolver a súa actividade. Entre as actividades que fan están as charlas aos enfermos, que se fan dúas veces por semana. Cada quince días a estas charlas acoden os familiares. “É imprescindible que, á parte do enfermo, os familiares tamén saiban que o alcoholismo é unha enfermidade, que o acepten e que saiban tamén como poder axudarlles ou os traumas que teñen xurdidos de todo o que viviron”, explicou Ferreiro.

A todo iso hai que engadir a atención a familiares, necesaria nalgúns momentos, e outras actividades como os talleres de arteterapia que non só se imparten no centro, senón que tamén se desenvolven no centro penitenciario de Lama, no que “poden chegar a ter ata da orde de 180 internos”.

Aínda que o consumo de alcohol está socialmente aceptado en moitas situacións, non deixa de implicar riscos para a saúde e o benestar se non se fai con moderación. Nina Ferreiro sinala a importancia de concienciar sobre eles a idades temperás. “É importante concienciar aos mozos, que xa entenden un pouco de bioloxía porque o estudaron, darlles matices do que lles provoca o alcohol no seu organismo, para que sexan conscientes do que fan. Pero en moitos casos falas con eles e dinche: a min non me vai pasar, eu controlo. É a ignorancia da idade, que pensan que a eles non lles vai pasar, que soe pasar aos maiores, aos que están máis curtidos, e non se dan conta de que están no camiño, que están adestrando. Sempre digo que á adicción chégase por adestramento”.

Unha carreira de longa duración

Nina Ferreiro subliñou que a rehabilitación “é unha carreira de longa duración, tan longa como a propia vida”. “És dependente do alcohol toda a túa vida. Se non estás en contacto con esa substancia, podes levar unha vida completamente normal. É como un diabético. Se se trata coa insulina, pode levar unha vida normal, e se non, pode ter moitos problemas, pero diabético vai ser sempre”.

O alcoholismo é unha “enfermidade crónica”, por iso, o labor destas asociacións é fundamental para axudar aos pacientes a “desenvolver habilidades sociais” e que esa decisión de non consumir “sexan capaces de mantela no tempo”.

O apoio de ARPO comeza cunha entrevista persoal na que se analiza o caso concreto e se desgrana como se lle pode axudar e se está preparado para entrar ou non nos grupos, unha das pedras angulares da súa actividade. “Nós podemos saber moito de alcoholismo, pero en realidade, quen mellor lles vai entender van ser outros compañeiros que sentiron esa mesma angustia e ansiedade. Son os que se poñen nos seus zapatos e lles poden trasladar as súas experiencias e como afrontaron eles a situación”.

ARPO, segundo sinalou Ferreiro, volverá a presentarse á nova edición do Plan Social de Ence. “Para nós é imprescindible, subsistimos con estas cousas”.