O plan de crecemento deste centro comercial galego suma 10 novas incorporacións.

O centro comercial Espazo Coruña segue o seu proceso de expansión e anunciou a chegada de dez novas empresas, que se foron incorporando nas últimas semanas, en réxime de venda e alugueiro ocupando en conxunto cerca de 4.000 metros cadrados.

Segundo apuntou a xerente do centro, Eva Rodríguez Peña, “A incorporación destas empresas supón un paso clave na consolidación do noso modelo. Espazo Coruña está a converterse nun espazo de referencia na cidade, onde conviven actividades moi diversas que xeran valor engadido tanto para as empresas que apostan por abrir o seu negocio aquí como para os usuarios que nos visitan”.

Novas empresas de Espazo Coruña

As novas empresas que se incorporan abranguen sectores que van dende a tecnoloxía, a consultoría ou a construción ata o deseño de interiores, a educación ou a cultura. Concretamente, os dez novos nomes son:

CIE (solucións TIC, servizos tecnolóxicos personalizados en infraestruturas de rede, centros de datos e comunicacións críticas).
Firmatel (telecomunicacións, informática, mercadotecnia e xestión enerxética).
Dorseran (reformas e mantemento de activos inmobiliarios).
Savia Espazos (interiorismo e mobiliario).
Campus Educa (academia de oposicións docentes).
Studio Punto Cero (danza contemporánea).
Dokka Comics (libraría especializada en manga, cómic, literatura infantil e xogos de mesa).
Local Ensaio (salas para grupos musicais).
Grupo Sampaio (xestión de cervexerías e restaurantes).
OFV Representacións (comercialización de marcas de electrodomésticos).

Plan de expansión

Tal e como explican dende a xerencia do centro, con estas novas incorporacións Espazo Coruña consolida o seu modelo de usos múltiples adaptado ás demandas actuais do mercado. “O interese que estamos recibindo demostra que a nosa proposta é sólida e atractiva. Seguimos traballando para ampliar a oferta con novas empresas que enriquecerán aínda máis”.

A xerencia do centro atópase en fase de peche de novos acordos que suporán a incorporación doutros 2.200 metros cadrados nos próximos meses, reforzando a “liña de crecemento sostido que caracteriza ao proxecto”.

“A entrada de novas oficinas non só amplía a nosa oferta profesional, senón que tamén impulsa a actividade diaria do centro. A presenza constante de traballadores e visitantes favorece directamente a operadores como Mercadona, Evofit e os espazos de restauración, que incrementan a súa clientela. Ao mesmo tempo, estes servizos reforzan o atractivo do centro para novas empresas, xerando un entorno dinámico e beneficioso para todos”, subliña Rodríguez Peña.

As novas aperturas súmanse a unha oferta que inclúe operadores como Mercadona, Tedi, os cinemas Yelmo e o ximnasio Evofit. A eles súmanse outras firmas como Luckia, a axencia inmobiliaria Garanty Home, a promotora Domos Estate, a empresa de enxeñería e topografía Pedro Cagiao, a firma de construción industrializada Koncreta, o servizo veterinario Vetter ou a empresa Unaqua.

En canto a gastronomía, o centro comercial coruñés conta con varios espazos hostaleiros como Torrentery, a franquía Cojonuditos, Konoha Sussi e un coffee corner, ademais de novas aperturas previstas nos próximos meses. Por último, na área de formación, destacan El Laboratorio, Mukina e o Club Xadrez Coruña.