A australiana EPE crece da man de Urovesa, a súa socia nos contratos de Nova Zelandia.

A australiana EPE inaugurou o pasado 16 de outubro a súa “nova e ampliada” sede en Upper Hutt. As novas instalacións, que servirán como sede central en Nova Zelandia, ocupan unha superficie de 600 metros cadrados e contan con oficinas, un almacén e un centro de mantemento e distribución. A compañía pechou o pasado marzo unha alianza con Urovesa para garantir o apoio loxístico no contrato de todoterreos Vamtac (Vehículos de Alta Mobilidade Táctica) co Exército de Terra neozelandés.

En concreto, en novembro de 2024 o Ministerio de Defensa de Nova Zelandia asinou un contrato coa firma galega capitaneada por Justo Sierra no marco do Proxecto de Capacidade de Mobilidade Protexida (PMCP) para substituír parte da súa flota de vehículos utilitarios operativos das Forzas de Defensa. En virtude deste acordo, Urovesa subministraría 40 novos vehículos medianos Vamtac CK3 e 20 vehículos lixeiros Vamtac ST5.

Tal e como avanzou Infodefensa entón, o encargo estaba valorado en torno aos 100 millóns de dólares neozelandeses, uns 56 millóns de euros ao cambio, e contemplábanse prazos de entrega ata 2027.

Dentro deste acordo EPE New Zealand entrou como socio local “aportando a súa experiencia local e un apoio integral para a posta en marcha da flota”, segundo explicaban desde a compañía. A compañía, que aterrou en Nova Zelandia en 2014, comprometeuse a recibir formación especializada de Urovesa, así como a ampliar as súas instalacións e aumentar o seu persoal para mellorar aínda máis o apoio que prestaba o seu equipo.

Contratos de mantemento a 20 anos

A estreita relación coa empresa galega foi un dos aspectos destacados polo director executivo do Grupo EPE, Warwick Penrose, na inauguración das novas instalacións. “Grazas á nosa colaboración con Urovesa no marco do Programa de Substitución de Vehículos Utilitarios, contamos agora cunha carteira de proxectos de mantemento a 20 anos, unha base que nos dá a confianza necesaria para seguir investindo en persoal, infraestrutura e innovación aquí mesmo, en Nova Zelandia”

Warwick Penrose tamén destacou que a publicación do Plan de Capacidades de Defensa do Goberno neozelandés establece “un ambicioso programa de investimento para garantir que Nova Zelandia conte coas capacidades, a infraestrutura e os servizos necesarios para protexer á súa poboación e intereses”.

“O Plan tamén identifica tres prioridades estratéxicas para a base industrial que definirán o futuro das alianzas na industria de defensa: capacidades espaciais; sistemas non tripulados e sistemas de contramedidas; e mantemento. Estas prioridades coinciden plenamente coa experiencia de EPE, e estamos preparados para apoiar á Defensa na transición da estratexia á implementación”, subliñou.