A presidenta de Inditex lembra os comezos de Amancio Ortega en 1975: “O futuro depende do que construamos”
Marta Ortega felicita o Nadal aos traballadores da multinacional cunha mensaxe na que tamén lembra que eles son "a maxia de Inditex" e na que lles traslada a súa "enorme gratitude".
Marta Ortega, na xunta de accionistas de Inditex 2025
Comentarios
Marta Ortega, presidenta non executiva de Inditex, felicitou as festas aos seus traballadores cunha mensaxe na que lembrou os inicios da compañía e recoñece o traballo realizado polo seu pai Amancio Ortega e por aqueles que emprenderon con el “aquela aventura” en 1975.
“O noso segredo sempre foi sinxelo: a determinación de mellorar cada día e a mirada firme cara ao horizonte. O traballo rigoroso, o compromiso e o respecto son os motores que nos trouxeron ata aquí e tamén as razóns da miña enorme gratitude cara a todos vós”.
“Nunca esquezades que vós sodes a maxia de Inditex, e que esa maxia segue viva porque hai alma en cada un dos vosos xestos. Manteñámola así, polos que foron, os que somos e os que serán”, destaca a presidenta de Inditex, quen engade que “foi un longo percorrido, pero cada ano volve ser un punto de partida”.
“O pasado deunos forma, pero o futuro depende do que sexamos capaces de construír xuntos”, afirma na mensaxe na que sinala que “desde aquel 1975, cada final de ano foi un momento para reflexionar sobre o conseguido e renovar a nosa ilusión polo futuro”.
“O señor Ortega e quen emprenderon con el aquela aventura tiñan moito que celebrar e aínda máis por soñar. Entre eles naceu un vínculo que segue sendo a nosa esencia: a confianza no traballo ben feito e nas persoas que o fan posible. Estou segura de que tamén valoraron a importancia do que nos une: a familia, os amigos, os compañeiros; o afecto e o respecto que dan sentido a todo o que facemos”, asegura Ortega na mensaxe de Nadal.
Por último, a presidenta de Inditex lembra que ao longo deste 2025 “tan especial”, o do 50 aniversario de Zara, o grupo mirou atrás para lembrar os seus orixes e todo o que construíu “con esforzo, dedicación e agarimo”.
“Sentímonos profundamente orgullosos do talento e o compromiso de quen, hai xa medio século, imaxinaron o que hoxe é Inditex e sentaron as bases das nosas grandes marcas: Zara, Massimo Dutti, Pull&Bear, Bershka, Stradivarius, Oysho, Zara Home e Lefties”, conclúe.
