As UTEs de Monbus conseguen reducir nun ano 24 sancións da Xunta por incumprimentos de contrato

O éxito de Monbus na repartición das liñas regulares de transporte da Xunta cargou de traballo o grupo de Raúl López nas estradas galegas e nos xulgados. A eles acudiu a compañía para tratar de frear unha cascada de penalizacións impostas pola Dirección Xeral de Mobilidade da Xunta, que en pequenas cantidades, sancionou practicamente todas as UTEs lideradas por Monbus que prestan estes servizos. En pouco máis dun ano, o grupo recibiu 25 resolucións, logrando rebaixar o importe da multa en 24 das sentenzas emitidas polo Tribunal Superior de Xustiza de Galicia. Con todo, os procedementos son máis, pois superan os 40 desde o ano 2024.

Todos teñen un mesmo orixe. A antiga Consellería de Infraestruturas e Mobilidade reprocha ao líder galego do transporte de viaxeiros por estrada non ter entregado determinada información respecto ao cadro de persoal, condutores ou acompañantes. A compañía alega que a plataforma da Xunta que se utiliza para cumprir con esas obrigas de comunicación, denominada Otrans, ten “serios fallos técnicos”. Ademais, aplicáronse cambios no seu funcionamento sen que se colgasen manuais nin se habilitase un servizo de axuda aos operadores. Eses problemas, argumenta Monbus, imposibilitáronlle, na práctica, ou dificultáronlle seriamente, trasladar a información pertinente sobre o cadro de persoal asignado a cada servizo.

A Xunta considerou esa falta de comunicación como unha infracción grave por incumprimento de contrato e impuxo unha cascada de sancións, normalmente de uns 2.000 euros ou inferiores, nas concesións de Monbus e os seus aliados. A lista de servizos penalizados é longa: Lugo-Santiago, A Cañiza e Arbo; Begonte-Rábade; as comarcas de Ferrol e Ortegal; Lugo-Lalín-Fisterra, sur da comarca de Santiago… e así, ata máis de 40 sancións e outros tantos procedementos contenciosos.

O criterio do TSXG

O criterio dos maxistrados do TSXG, como cabería agardar, é o mesmo desde 2024, cando comezou a resolver os recursos contra as sancións da Dirección Xeral de Mobilidade. Entende que non hai suficiente carga probatoria na argumentación das UTEs para demostrar a imposibilidade de enviar a información, por exemplo, ao non advertir á Xunta das súas dificultades. Con todo, si que demostra que houbo vontade de comunicar. No caso da Consellería de Infraestruturas e Mobilidade, admite que a conduta é sancionable pero disinte da súa gravidade. Entende que non pode ser considerada moi grave unha infracción cando Monbus puido comezar a operar o servizo sen que a Xunta lle reclamase o envío dos datos que faltaban.

Por tanto, decide manter as sancións, pero rebaixa o importe. Dos 2.000 euros que, habitualmente, impuña o Goberno galego, a maior parte das sancións redúcense a 1.000 euros, na concatenación de sentenzas que son recurribles en casación. Curiosamente, a última emitida, o pasado 29 de xaneiro, ten un fallo desestimatorio. Trátase dunha penalización de 2.400 euros por dúas infraccións derivadas de utilizar dous vehículos e un condutor non adscritos ao servizo de transporte entre Lugo, Ourense e Vigo.

O concurso de transporte regular de viaxeiros por estrada, que desencadeou as máis de 40 sancións ás UTEs de Monbus, foi tamén o que provocou a investigación por cartel con Alsa e as multas a 21 empresas de ambos grupos por prácticas colusorias.