Caixabank eleva un 44% a financiación a empresas en Galicia e alcanza os 2.315 millóns

Caixabank aumentou en 2025 un 44% o orzamento destinado a financiar empresas en Galicia, ata acadar os 2.315 millóns. Esta actividade materializouse en 5.781 operacións de crédito, un 7% máis que en 2024.

Segundo explican desde a entidade nun comunicado, os recursos financiaran principalmente liquidez e investimentos orientados ao crecemento de pequenas, medianas e grandes compañías da rexión. “Ademais, a entidade pon a disposición do tecido empresarial distintas solucións especializadas que van desde solucións máis comúns como o factoring, confirming ou renting ata produtos máis sofisticados como o fondo Added Value, o fondo Venture Debt, financiamento estruturado ou crédito provedor, entre outras opcións deseñadas para cubrir tanto necesidades de circulante como proxectos de investimento a longo prazo”.

O director territorial norte de Caixabank, Juan Pedro Badiola destacou a “fortaleza e capacidade de crecemento do tecido empresarial galego”, ao que cualificou como “motor fundamental do seu desenvolvemento económico”. Badiola subliñou que “o apoio de CaixaBank non se limita á financiación: os nosos xestores traballan de forma próxima coas empresas para comprender os seus retos e ofrecer solucións a medida e un acompañamento integral”.

A entidade conta en Galicia con oito centros e oficinas especializadas dedicadas exclusivamente a atender as necesidades das empresas, nos que equipos expertos en xestión empresarial poñen a disposición dos clientes unha proposta de valor diferencial, baseada en asesoramento experto e unha ampla gama de produtos e servizos.

Apoio ás empresas

“CaixaBank é a entidade de referencia para empresas en España. Os clientes da entidade financeira benefícianse dun modelo de especialización despregado desde os seus 212 centros de empresa repartidos por toda a xeografía española, nos que traballan máis de 2.000 profesionais altamente cualificados e cunha sólida reputación no asesoramento empresarial”. 

Tal e como explican desde a compañía, contan con especialistas en financiación, pemes, comercio exterior, tesouraría, turismo, negocio inmobiliario e agroalimentario, que ofrecen un servizo personalizado máis alá do financeiro para apoiar e impulsar o sector empresarial.

No ámbito internacional, CaixaBank “apoia aos seus clientes empresa con diversas solucións operativas con acceso efectivo territorial a 156 mercados de distintos países e ofrece o mellor asesoramento para as súas operacións no estranxeiro”. A entidade presta servizo tanto ás pemes e microempresas que están iniciando as súas actividades exportadoras como ás grandes corporacións e grupos empresariais que afrontan proxectos internacionais máis complexos. 

CaixaBank lanzou o seu novo Plan de Sostibilidade trienal, que forma parte do novo Plan Estratéxico 2025-2027, co que mobilizará 100.000 millóns de euros en finanzas sostibles para continuar avanzando cara a unha economía máis sostible e favorecer o desenvolvemento económico e social das persoas.