Contrasoño para salvar Losán: os traballadores piden á Xunta convocar unha mesa negociadora coa SEPI

O comité de Industrias Losán reclamou á Xunta que convoque de inmediato unha mesa negociadora coa participación da administración galega, a SEPI, a empresa e os sindicatos, para buscar “solucións urxentes” á situación que atravesa a compañía, e advertiu de que “están en risco” uns 200 empregos.

O órgano de representación advertiu de que o próximo 29 de abril é unha data límite “clave” e a “incapacidade” da empresa para sacar adiante o plan de reestruturación compromete a continuidade do cadro de persoal dos centros de Curtis, Vilasantar e as oficinas da Coruña.

“Suposto plan de futuro”

Por iso, instan á Xunta a implicarse para “facilitar un espazo de diálogo real e efectivo entre empresa, persoas traballadoras e institucións” para desbloquear a situación e garantir a viabilidade industrial e laboral.

Segundo apuntaron os representantes dos traballadores, a dirección da empresa realizou visitas recentes aos centros de traballo para presentar un “suposto plan de futuro“, pero non facilitou os plans de reestruturación nin ofreceu información detallada a pesar das peticións do comité.

“Propostas inviables”

Os comités das fábricas de Galicia, Castela e León e Castela-A Mancha coinciden en criticar esta “falta de transparencia” e consideran que as propostas trasladadas pola empresa son “irreais e inviables”, xa que pasan por manter a actividade nalgunhas plantas “sen regularizar as nóminas pendentes nin fixar un calendario de pagos que garanta o seu aboamento”.

Ao respecto, lamentan que “non existe un verdadeiro plan industrial”, senón unha estratexia “orientada a salvagardar os intereses dos propietarios a través da redución da débeda e a posible venda de activos”, e lembraron que a empresa arrastra unha “elevada débeda”.

A CIG denunciou que, se non hai avances no plan de viabilidade, estaríase ante un “desmantelamento industrial en comarcas rurais e con gran potencial forestal”, e advertiu de que “non se entendería” que Industrias Losán non fose tida en conta no deseño do plan estratéxico forestal da Xunta.