Exolum, cun proxecto de 100 millóns en Langosteira, estrea un servizo de subministración de biometanol para barcos.

Exolum, a compañía que proxecta unha terminal de transición enerxética no Porto Exterior da Coruña cunha inversión superior aos 100 millóns de euros, puxo en marcha no porto de Immingham (Reino Unido), xunto a Orsted e Methanex, o primeiro servizo comercialmente operativo de almacenamento e subministración de biometanol para o transporte marítimo.

Segundo destacan desde a compañía trátase dunhas instalacións nun enclave considerado estratéxico para os combustibles baixos en carbono por ser o maior porto británico por volume de carga.

“A iniciativa demostra como a infraestrutura e a loxística existentes da compañía poden adaptarse a novos combustibles sostibles e actuar como alavanca para acelerar a descarbonización dun dos sectores máis difíciles de transformar, informou nunha nota a firma española especializada no transporte e almacenamento de combustibles, hidrocarburos, produtos químicos e biocombustibles”, explican desde a compañía.

Exolum achega as instalacións de almacenamento e abastecemento en Immingham, mentres Methanex encárgase do subministro de biometanol e Orsted será o primeiro usuario do servizo, empregando este combustible en buques que dan soporte aos seus parques eólicos mariños no mar do Norte.

Tal e como detallan o biometanol certificado ISCC prodúcese a partir de materias primas derivadas de residuos e desfeitos, como residuos sólidos urbanos orgánicos, e pode reducir ata nun 80% as emisións de gases de efecto invernadoiro fronte aos combustibles mariños convencionais.

O transporte marítimo representa o 4,7% das emisións de CO2 relacionadas co transporte no Reino Unido, máis que autobuses, trens e aviación doméstica xuntos, e o país marcou o obxectivo de recortar un 30% estas emisións para 2030, un 80% para 2040 e alcanzar as cero emisións netas en 2050.

Exolum subliña que este proxecto “pioneiro” reforza o seu papel como “facilitador da transición enerxética e senta as bases para replicar solucións loxísticas similares noutros mercados europeos á medida que o sector marítimo avanza cara a modelos de baixas emisións”.

O proxecto da Coruña 

En setembro do ano pasado Exolum anunciou o inicio dos trámites de autorización para a construción dunha nova terminal de almacenamento de graneis líquidos no Porto Exterior da Coruña.

O proxecto, que suporía unha inversión de máis de 100 millóns de euros, está concibido como unha terminal de transición enerxética deseñada para adaptarse progresivamente á evolución do mercado, a normativa e a demanda industrial, e preparada para operar tanto con produtos convencionais como con combustibles sostibles, como o amoníaco renovable, o dióxido de carbono capturado, o metanol verde, o SAF (Sustainable Aviation Fuel) e outros biocarburantes.

A iniciativa contempla o desenvolvemento dunha planta deseñada baixo “estritos criterios de seguridade, eficiencia enerxética, automatización e sostibilidade ambiental” que estaría distribuída en dúas parcelas diferenciadas pero conectadas, cunha capacidade total de aproximadamente 165.000 m3 repartidos en varios tanques (atmosféricos, crioxénicos e presurizados) preparados para almacenar combustibles de baixas emisións, produtos químicos, amoníaco e dióxido de carbono.

A proposta incluiría un cargadoiro ferroviario de ancho ibérico con conexión directa á rede nacional, a conexión da terminal a dous atracadores para buques mediante unha rede de tubaxes e bombas de gran capacidade e isletas de carga para camións cisterna, ademais de todos os sistemas auxiliares de operación e seguridade.