H&M, histórico rival de Inditex, gaña un 4,6% máis en 2025 pero avanza unha caída de vendas.
A compañía sueca indica que se viu impactada en decembro e xaneiro pola boa acollida do Black Friday antes do período, aínda que aposta por subir o dividendo un 4%.
Tenda de H&M no centro comercial Gran Vía de Vigo.
Comentarios
Unha de cal e outra de area para H&M, un dos rivais tradicionais de Inditex no retail. A compañía sueca presentou este xoves os resultados correspondentes ao seu exercicio fiscal 2025 no que logrou superar as expectativas dos analistas en canto a ganancias. Anotouse un beneficio neto de 12.158 millóns de coroas, uns 1.150 millóns de euros ao cambio, o que supón un incremento dun 4,6%. Con todo, o grupo arrincou a sesión na bolsa de Estocolmo con caídas debido ao seu anuncio dunha contracción de vendas nos meses de decembro e xaneiro en comparación co mesmo período do ano anterior.
As métricas de H&M están a anos luz das de Inditex, aínda que poden evidenciar certos comportamentos do mercado. Os suecos pechan o seu ano fiscal en novembro mentres que os galegos fano en febreiro. En todo caso, a compañía de Marta Ortega cotiza este xoves á alza no Ibex, sen que os resultados da súa competidora parezan ter ningún impacto. No caso da matriz de Zara, o consenso de mercado cre que finalizará o seu exercicio 2025-2026 cun resultado neto que se achegará aos 6.150 millóns de euros, case un 5% máis.
Vendas
As vendas netas da firma escandinava ascenderon a uns 21.588 millóns de euros, un 2,6% por baixo dos ingresos do ano anterior, aínda que en moeda local a facturación anual incrementouse un 2%.
As vendas da cadea sueca en Asia e Oceanía sumaron 26.493 millóns de coroas (2.505 millóns de euros), un 7,4% menos que o ano anterior; mentres que en Europa e África alcanzaron os 152.794 millóns de coroas (14.449 millóns de euros), un 0,8% menos; e en América diminuíron un 5,4%, ata 48.998 millóns de coroas (4.633 millóns de euros).
No último trimestre do seu ano fiscal, H&M obteu un beneficio neto atribuído de 4.362 millóns de coroas suecas (413 millóns de euros), un 46% máis que un ano antes, mentres que as vendas netas da cadea téxtil sumaron 59.221 millóns de coroas (5.600 millóns de euros), un 4,8% menos.
A compañía foi das firmas de moda que máis tardou en superar o impacto do coronovirus e nestes momentos ten unha estratexia de optimización de espazos e custos. Ao peche do exercicio, a cadea contaba cun total de 4.101 tendas en todo o mundo, o que supón un descenso neto de 152 establecementos no ano, incluíndo unha redución neta de 17 tendas no cuarto trimestre.
Neste sentido, a firma sueca planea a apertura en 2026 de arredor de 80 novas tendas, mentres que se prevé o peche de arredor de 160. Aínda que H&M planea aperturas en todas as rexións, a maioría delas realizaranse en mercados en crecemento.
Mal decembro e xaneiro
A pesar de que H&M aguantou o tipo cos seus números correspondentes ao exercicio 2025, foi penalizada pola desaceleración nos primeiros compases do ano. A firma espera que as súas vendas no período comprendido entre o 1 de decembro de 2025 e o 31 de xaneiro de 2026 diminúan un 2% en moeda local en comparación co mesmo período do ano anterior. Iso si, indica que foi polas fortes no período inmediatamente anterior. Este desenvolvemento “debe considerarse á luz das fortes vendas durante a semana do Black Friday a finais de novembro”, que provocou unha demanda moderada en varios mercados en decembro. Ademais, H&M advertiu do efecto calendario negativo asociado ao Ano Novo Chinés, que este ano cae en febreiro.
Na presentación do seu último trimestre fiscal, Inditex tamén destacou o bo comportamento do mercado xa antes da celebración do Black Friday.
A compañía anunciou que que proporá á súa xunta xeral de accionistas pagar un dividendo de 7,10 coroas suecas por acción en dous pagos, un 4% que o exercicio anterior.
