Jacinto Rey renova ata os 80 anos no consello de San Xosé co soño da ‘Operación Chamartín’ ao alcance

Grupo San José, a maior construtora galega, celebrou de xeito telemático a súa xunta de accionistas este xoves cunha participación discreta, do 66% do capital, e con éxito das propostas, pois saíron adiante todos os puntos da orde do día. Entre eles, a renovación por catro anos máis de Jacinto Rey González, presidente e máximo accionista, como conselleiro executivo do grupo.

O empresario pontevedrés, nado en 1951, recibiu o voto favorable do 98,4% do capital presente, co que blinda a súa continuidade no órgano de goberno ata os 80 anos na mesma sesión na que renovaron cargo os seus fillos, Jacinto e Javier Rey Laredo, vicepresidentes primeiro e segundo do grupo construtor.

A continuidade de Rey González, que controla o 48,3% do grupo, acontece con toda naturalidade para quen dirixiu a expansión e a saída a bolsa da compañía, e prodúcese no arranque dun dos grandes proxectos da súa traxectoria, a Operación Chamartín. Un día antes da xunta de accionistas, o gran desenvolvemento urbanístico do norte de Madrid deu o último paso antes de iniciar as obras coa sinatura do replanteo que formaliza o comezo dos traballos en Las Tablas Oeste, un dos ámbitos nos que se estrutura o proxecto.

Madrid Nuevo Norte actuará sobre 3,4 millóns de metros cadrados para erguer 10.500 vivendas. Destinará 1,5 millóns de metros cadrados a oficinas e 400.000 metros cadrados de zonas verdes, incluído un gran parque central de 13 hectáreas. Jacinto Rey move papeis desde hai 30 anos para poder materializar este proxecto, que descarrilou en múltiples ocasións e que agora comeza a facerse realidade. Na promotora está San José, cun 11% do capital; Merlin Properties, co 14,6% que comprou á construtora galega; e BBVA, que detenta o 75,5%.

Os números de San José e Jacinto Rey

O grupo chega á operación urbanística nun momento doce, coa capitalización bursátil por riba dos 550 millóns tras medrar un 13% este ano; e cunha carteira de contratos récord de máis de 3.600 millóns. A compañía pechou o seu último exercicio cun volume de negocio de 1.588 millóns, un 2% máis, e uns beneficios de 40,8 millóns, o que supón un 26,1% máis que en 2024. A evolución positiva destas magnitudes construíuse no mercado español, que representa o 80% da cifra de negocio, en parte grazas aos plans de vivenda de Isabel Díaz Ayuso, nos que San José é un dos grandes adxudicatarios.

Jacinto Rey, antigo alumno da Universidade Laboral de Xixón, percibiu 1,05 millóns polos seus servizos á compañía como presidente e conselleiro executivo, na súa particular remuneración menguante, xa que en 2024 percibiu 1,06 millóns; en 2023, 1,15 millóns; en 2022, 1,27 millóns; e en 2021, 1,37 millóns. Nada preocupante para o construtor pontevedrés, que ingresará tamén a parte que lle toca do dividendo de 11,7 millóns aprobado na xunta de accionistas.

A inquietude de Jacinto Rey

A Operación Chamartín é a última estación na longa lista de proxectos nos que se embarcou Jacinto Rey e que non sempre saíron adiante, a pesar de parecer menos complexos que Madrid Nuevo Norte. Xa con mando en praza na construtora, o empresario galego aliouse con Amancio Ortega e Julio Fernández Gayoso, primeiro executivo da desaparecida Caixanova, para tratar de facerse con Unión Fenosa e conseguir a regalleguización da eléctrica. Aquela operación fallida foi causa de discordia entre Amancio Ortega e o falecido José María Castellano, que acabaría deixando Inditex tras 30 anos de alianza co home máis rico de España.