José Blanco di que a venda de Acento ao grupo francés Havas non foi un “pelotazo”: “É un recoñecemento do mercado”.

A venda de Acento Public Affairs, a consultora fundada polos exministros José Blanco e Alfonso Alonso, ao grupo francés Havas non foi un “pelotazo” senón máis ben “un recoñecemento do mercado a unha traxectoria; se fan esta operación é para seguir construíndo, para seguir crecendo e para seguir fortalecendo a compañía”. Así o apuntou o propio Blanco, quen lembra que se trata dunha venda graduada que terminará coa súa saída da compañía como accionistas en 2030.

En unha entrevista para El Progreso, o exministro sostén que é un bo acordo tanto para a consultora como para a empresa que os vai acoller xa que “formarán parte dunha rede internacional que nos permite ampliar capacidades, asumir novos retos e mellorar os servizos que ofrecemos, mantendo intactos os valores, a identidade e a forma de traballar que nos trouxo ata aquí”.

“Este grupo é unha gran multinacional, cuxa matriz é Vivendi e a partir de aí está Havas, que é un dos grupos media máis importantes do mundo; e logo, dentro de Havas, está a división H Advisors, que é a que está máis especializada en comunicación estratéxica e asuntos públicos. Eles están comprando compañías en todo o mundo, en Alemaña, Reino Unido, Portugal… Compran consultoras como a nosa porque queren crecer neste sector. Estiveron vendo en España algunhas compañías e ao final decantáronse por nós. É un proceso no que levamos traballando un ano, o cal para nós é un recoñecemento moi importante ao traballo que viñemos desenvolvendo. Non obedece a ningunha outra cuestión máis que ao seu plan estratéxico”, sinalou Blanco.

Na entrevista Blanco destacou “os últimos datos de crecemento económico e as perspectivas para este ano”, e reivindicou que España “leva varios anos crecendo máis que a media e xerando actividade, moita actividade económica e moito emprego”. “Iso fai que moitos investidores estean mirando a evolución de España, e polo tanto, tratando de poder investir e desenvolver actividade económica nova aquí.”

Proxecto de Altri

Un dos proxectos ao que a consultoría prestou os seus servizos é o da planta que a pastera portuguesa Altri proxecta no concello de Palas de Rei.

Segundo explicou o empresario lucense, “Galicia necesita, e a política necesita, facer unha reflexión: Que queremos ser neste tempo? Que queremos ser de maiores? Porque se queremos ter unha rede, ter capacidade para industrializar Galicia, terémola que ter en relación con o que somos capaces de producir, xa sexa no sector da madeira, no sector da enerxía ou noutros sectores. É dicir, ninguén vai montar en Galicia unha fábrica de transformación de laranxas”.

“Eu vexo que ante os grandes desafíos que ten Galicia, ao final non paran de ter obstáculos. Véxoo coas enerxías limpas, por poñer un exemplo. Falar de industrialización de Galicia sen que vaia acompañado de medidas, sendo o populismo o que marque decisións estratéxicas, paréceme que non é o mellor”.

Os números de Acento

O 2024 foi un ano récord para Acento Public Affairs. A consultora pechou o exercicio con máis de dous millóns de euros de beneficio e 9,6 millóns de facturación tras crecer un 22%. Os beneficios da consultora incrementáronse un 47%, ata alcanzar os 2,09 millóns de euros. A firma optou, ao igual que en exercicios anteriores, por descartar a opción de aboar un dividendo aos seus accionistas. No seu lugar, destinou a totalidade desta cantidade a reservas voluntarias.