Lamento da patronal eólica polos parques galegos: "É prioritario desbloquear máis de 2.800 megavatios"

A patronal eólica volve reclamar un marco regulador “estable” e interpretacións xurídicas “únicas e coherentes” no Estado español e pon a mirada na situación galega, con decenas de proxectos parados nos xulgados. Ademais, outro dos seus cabalos de batalla é a, ao seu xuízo, excesiva burocracia que ralentiza a execución.

Na inauguración da xornada de Análise Operativa de Parques Eólicos organizada pola Asociación Empresarial Eólica (AEE), a presidenta da patronal, Rocío Sicre, asegurou que o desenvolvemento dos novos proxectos eólicos “enfróntase a prazos de tramitación excesivamente longos que comprometen o cumprimento dos obxectivos de crecemento”.

No marco desta xornada, Sicre centrouse na situación galega e pediu a execución de sentenzas que, segundo sosteñen, desbloquearían os parques paralizados polo Alto Tribunal galego.

Sentenza de Bruxelas

“É prioritaria a execución das sentenzas do TJUE e do Tribunal Supremo en Galicia a favor dos proxectos eólicos e a tramitación realizada pola Xunta de Galicia, para desbloquear máis de 2.800 megavatios (MW) – máis de 3.500 millóns de euros de investimentos – que se atopan paralizados polo TSXG desde hai tres anos”, engadiu.

A sentenza do TJUE coñecida o pasado agosto ditaminou que os procesos de avaliación ambiental da Xunta para a autorización de parques eólicos era válida, unha cuestión que mantivera paralizados moitos proxectos de forma cautelar na comunidade. Con todo, hai que lembrar que grupos ambientalistas, así como o BNG e o PSdeG indicaron que o ditame non servirá para solucionar a paralización, xa que moitos proxectos seguirán no limbo por outros motivos non administrativos senón de carácter ambiental.

En calquera caso, a patronal eólica reivindicou o sector. Sicre asegura que ten un potencial que representa para España máis de 32 gigavatios (GW) instalados que achegan arredor do 23% da electricidade que se consome -sendo a primeira tecnoloxía do mix-, e da cadea de valor que representa o sector, aínda que advertiu dos “desafíos globais” aos que se enfronta, como a crecente presión da industria chinesa que “compite con custos baixos”, ou a guerra global de aranceis entre mercados estratéxicos como Estados Unidos, entre outros.

“Estes factores poñen a proba a resiliencia do noso tecido industrial, onde a operación de parques eólicos tamén ten aquí un papel decisivo para seguir mantendo activa esta cadea de valor, xerar novas oportunidades e defender un modelo industrial forte, competitivo e sostible”, dixo.

Repotenciacións

Por outra parte, destacou que a repotenciación aumentará significativamente a produción eólica cun menor impacto ambiental e territorial, aínda que considerou que “non está despegando ao ritmo que debería”.

A este respecto, engadiu que a repotenciación enfróntase a un permitting aínda máis complicado que o dun parque novo, con múltiples riscos e con uns resultados de mellora do caso de negocio que non sempre están tan claros.

Por iso, solicitou ferramentas reguladoras que fagan posible un ritmo de repotenciación, cun enfoque de impacto ambiental diferencial e sendo conscientes da realidade económica e contable destas instalacións.